ჯანდაცვის მინისტრმა, დავით სერგეენკომ დიღმის მასივის მეოთხე კვარტალში მომხდარი ძლიერი აფეთქების შესახებ პირველი კომენტარი გააკეთა. ჯანდაცვის მინისტრის თქმით, შემთხვევის დროს დაშავებული 8 ადამიანი სხვადასხვა კლინიკებში არიან გადაყვანილები, დაშავებულთაგან ორის მდგომარეობა კი შედარებით საყურადღებოა.
„დღევანდელი უბედური შემთხვევის შედეგად, 8 ადამიანმა მიიღო დაზიანება, ისინი განაწილებულები არიან სხვადსხვა კლინიკებში. ორმა მათგანმა უკვე მიიღო ამბულატორიული დახმარება და ისინი გაეწერნენ, ორის მდგომარეობა არის საყურადღებო. კრიტიკული მდგომაროება, საბედნიეროდ, არც ერთთან არ არის, მაგრამ ორი, რომელსაც სასუნთქი გზების დამწვრობა აქვს, მას ძალიან ინტენსიური მკურნალობა და მონიტორინგი დასჭირდება. რაც შეეხება ასეთ შემთხვევებს, ამაზე ძალიან ფართო ჩართულობა არის, როგორც მუნიციპალიტეტის, ასევე შესაბამისი სამსახურების, რომ დაკეტილ ბინებში, ის ვინც ბინას აქირავებს და ასევე მიმდინარეობს შემოწმება და ინსპექტირება იმ გამათბობელი გაზზე მომუშავე ხელსაწყოების,“ - აცხადებს სერგეენკო.
დიღმის მასივში ძლიერი აფეთქება დღეს მოხდა. წინასწარი ინფორმაციით, შემთხვევა სავარაუდოდ გაზის გაჟონვამ გამოიწვია. აფეთქების შედეგად 8 ადამიანმა მიიღო დაზიანება.
