თურქეთის გარემოს დაცვისა და სატყეო სამინისტროს ათკაციანი დელეგაცია დაცული ტერიტორიების სააგენტოში ვიზიტით იმყოფება.
გარემოს დაცვის სამინისტროს ინფორმაციით, გაცვლითი პროგრამის ფარგლებში თურქი ექსპერტები გამართავენ სამუშაო შეხვედრებს დაცული ტერიტორიების სააგენტოში, ეწვევიან ვაშლოვანის და თუშეთის ეროვნულ პარკებს. ხუთდღიანი ვიზიტის განმავლობაში განხილული იქნება ჯეირნების რეინტროდუქციის პროექტის მიმდინარეობა და ტრანსასაზღვრო თანამშრომლობის საკითხები.
ვიზიტი ხორციელდება თურქეთ-საქართველოს ტრანსსასაზღვრო თანამშრომლობის ფარგლებში ბუნების დაცვის მსოფლიო ფონდის (WWF) კავკასიის წარმომადგენლობის ფინანსური მხარდაჭერით. ვიზიტის მიზანია მხარეებს შორის გამოცდილების გაზიარება, თანამშრომლობის გაღრმავება და სამომავლო ქმედებების დაგეგმვა.
ამავე გაცვლითი პროგრამით, თურქეთ-საქართველოს ტრანსსასაზღვრო თანამშრომლობის ფარგლებში, ქართულმა ათკაციანმა დელეგაციამ დაცული ტერიტორიების სააგენტოს წარმომადგენლების მონაწილეობით თურქეთში ვიზიტი მიმდინარე წლის ზაფხულში განახორციელა.
დელეგაციის ვიზიტი 19 სექტემბრამდე გასტანს.
