სტატისტიკის ეროვნული სამსახურის მიერ გამოქვეყნებულ მონაცემს ექსპერტები ეხმაურებიან.
ეკონომიკის ექსპერტის, სოსო არჩვაძის განცხადებით, მართალია 2018 წელს ინვესტიციების მოცულობა შემცირდა, მაგრამ აქ უნდა გავითვალისწინოთ გარე და შიდა ფაქტორები. „გარე ფაქტორებიდან უნდა გამოვყოთ ძვირი დოლარის პოლიტიკა, საინვესტიციო გარემოს გაუარესება მსოფლიოს მრავალ ქვეყანაში და ქვეყნებს შორის ჯანსაღი კონკურენციის ზრდა. ამიტომ მე ვფიქრობ, რომ ჩვენ კიდევ უფრო მეტი ძალისხმევა დაგვჭირდება, რომ ქვეყანაში საგადამხდელო ბალანსის დადებით იყოს“ - აღნიშნავს არჩვაძე
ამასთანავე, ექსპერტი აცხადებს, რომ ბევრი უცხოელი ინვესტორი, რომელიც წლების განმავლობაში საქართველოსთან თანამშრომლობდა, შემოვიდა როგორც უცხოელი ინვესტორი და შემდეგ, ფაქტობრივად, დარეგისტრირდა, როგორც ადგილობრივი მეწარმე. მათ კომპანიებში მიიღეს საკონტროლო პაკეტი. შედეგად, რაც წლების განმავლობაში უცხოურ ინვესტიციად ითვლებოდა, დღეს დაფიქსირდა როგორც შიდა ინვესტიცია. „ამ ფონზე, ჩვენი ეკონომიკა მაინც შთამბეჭდავი პროცენტით გაიზარდა, რაც ნიშნავს, რომ ის მყარად დგას ფეხზე და ამას დანახვა და აღიარება უნდა. ჩვენ ადრე დამოკიდებული ვიყავით სხვადასხვა სახის უცხოურ დახმარებებზე - ჰუმანიტარული იქნებოდა, ტექნიკური თუ სხვა, მაგრამ დღეს ქვეყანას აქვს იმხელა პოტენციალი, რომ საგარეო დახმარების შემცირების ფონზეც კი იქონიოს ეკონომიკის ზრდის მზარდი პოტენციალი. მთლიანობაში ქვეყანაში ადგილი აქვს ეკონომიკის ზრდასაც, ინვესტიციების ზრდასაც და საქართველოს ხელისუფლება აკეთებს ყველაფერს, რომ მიმზიდველი საინვესტიციო გარემო შეუქმნას ინვესტორებს და ეკონომიკის ზრდის კიდევ უფრო მარალი მაჩვენებელი დაფიქსირდეს“, - აცხადებს სოსო არჩვაძე.