2018 წლის აჭარის რესპუბლიკური ბიუჯეტის გეგმა 7.9%-იანი, ხოლო ნაერთი ბიუჯეტის გეგმა 6.7%-იანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, 2018 წლის იანვარ-დეკემბერში აჭარის რესპუბლიკური ბიუჯეტის გეგმა 267 მლნ 666 ათას 400 ლარი იყო, თუმცა შესრულებამ 288 მლნ 741 ათას 400 ლარი შეადგინა, ანუ გეგმა 107.9%-ით შესრულდა.

სამინისტროს ინფორმაციით, რესპუბლიკური ბიუჯეტის გადასახადების მუხლი, 12 თვის მონაცემებით, 109.2%-ით შესრულდა, სხვა შემოსავლების მუხლი 99.6%-ით, ხოლო არაფინანსური აქტივების (კლება) მუხლი 101.2%-ით.

რაც შეეხება 2018 წლის ნაერთი ბიუჯეტის გეგმას - 381 მლნ 897 ათას 500 ლარი იყო, თუმცა ის 6.7%-ით გადაჭარბდა და შესრულებამ 407 მლნ 533 ათასი ლარი შეადგინა.

საბიუჯეტო მონაცემები ცხადყოფს, რომ აჭარის ნაერთი ბიუჯეტის გადასახადების მუხლი 8.6%-იანი, სხვა შემოსავლების მუხლი 3.4%-იანი გადაჭარბებით, ხოლო არაფინანსური აქტივების (კლება) მუხლი მხოლოდ 97.7%-ითაა შესრულებული.

რაც შეეხება თვითმმართველ და მუნიციპალურ ბიუჯეტებს მათი შესრულების მონაცემები ასე გამოიყურება: ბათუმი 102.5%-ი, ქობულეთი - 110.9%-ი, ხელვაჩაური - 113%-ი, ქედა - 98.8%-ი, შუახევი - 103.8%-ი და ხულო - 103.9%-ი.