ზამთრის სეზონის მოახლოებასთან დაკავშირებით, სატყეო სააგენტოს თავმჯდომარის დავალებით, რეგიონული სატყეო სამმართველოები მუშაობის განსაკუთრებულ რეჟიმზე გადავლენ, რათა დროულად მოხერხდეს ადგილობრივი მოსახლეობის შეშით უზრუნველყოფა.
ამ მიზნით, გარემოს დაცვის სამინისტროს სატყეო სააგენტოს თავმჯდომარე პაპუნა ხაჩიძე რეგიონალური სატყეო სამმართველოების უფროსებს შეხვდა და გაწეული საქმიანობის ანგარიში მოისმინა.
საშეშე მერქნის შეძენის მსურველი ნებისმერ ბანკში ბუნებრივი რესურსებით სარგებლობისათვის მოსაკრებელის გადახდის ქვითარს ტყის მცველს წარუდგენს, რის შემდეგაც ტყის მცველი მიუთითებს მოსაჭრელად მონიშნულ ხეებს ტყეკაფში. დამზადების შემდეგ კი, ადგილობრივ მცხოვრებს ხე-ტყის კანონიერად მოპოვების დამადასტურებელი დოკუმენტი გადაეცემა.
ადგილობრივი მოსახლეობისათვის საშეშე მერქნის რაოდენობა განისაზღვრება მუდმივი საცხოვრებელი ადგილის მიხედვით, კერძოდ მაღალმთიანი რეგიონებში მცხოვრებთათვის - არაუმეტეს 12 მ3, ხოლო დანარჩენ ტერიტორიაზე 7 მ3.