ცხინვალის სეპარატისტული რეჟიმის შეფასებით, გაეროს მიერ მიღებული რეზოლუცია დევნილების პრობლემის მოგვარებას ხელს არ შეუწყობს. ამის შესახებ ნათქვამია კოკოითის რეჟიმის ე. წ. საგარეო საქმეთა სამინისტროს მიერ გავრცელებულ განცხადებაში.
მათი მტკიცებით, ჯერ კიდევ 90-იანი წლებიდან ცდილობს სეპარატისტული რეჟიმი ადგილნაცვალი პირებისა და ლტოლვილების საკითხის მოგვარებას "სამართლიანად და საერთაშორისო გადაწყვეტილებით" და ამ მიზნით ე. წ. სამხრეთ ოსეთი საერთაშორისო თანამეგობრობის და ცალკეული ქვეყნების კონსტრუქციულ წინადადებებს ყოველთვის მხარს უჭერდა.
"თუმცა მიგვაჩნია, რომ 2010 წლის 7 სექტემბერს გაეროს გენერალური ასამბლეის მიერ მიღებულმა რეზოლუციამ, რომელსაც მხარი გაეროს წევრი ქვეყნების მეოთხედმა დაუჭირა, საეჭვოა პრობლემის მოგვარებას ხელი შეუწყოს, რადგან ეს რეალობას სრულად უგულებელყოფს", - ნათქვამია სეპარატისტების განცხადებაში.
ამასთან, ცხინვალის სეპარატისტული რეჟიმი საქართველოს შემადგენელ ნაწილად ე. წ. სამხრეთ ოსეთის მოხსენიებას აპროტესტებს და აცხადებს, რომ "სამხრეთ ოსეთი აღიარებული რესპუბლიკა, აქვს თავისი ტერიტორია და ამიტომ არ უნდა მოხდეს მისი მოხსენიება საქართველოს შემადგენელ ნაწილად, როგორც ეს რეზოლუციაშია ასახული. პირიქით, დოკუმენტში არასადაა მოხსენიებული ქართული მხარის მიერ გამოდევნილი ოსი, რომელიც სამხრეთ ოსეთმა და რუსეთის ფედერაციამ შეიფარა. აღნიშნული დოკუმენტის მიხედვით საქართველოს ამ პრობლემის მოგვრების რეალური სურვილი არ აქვს".
მათი შეფასებით, გაეროს მიერ მიღებული რეზოლუცია ხელს არ შეუწყობს ჟენევის მოლაპარაკებას, რომელიც დღემდე ერთადერთ ადგილს წარმოადგენს, სადაც აფხაზ და ოს სეპარატისტებთან ქართულ მხარეს რიგი პრობლემების განხილვის საშუალება ეძლევა.
"სამხრეთ ოსეთმა არაერთხელ დააყენა საკითხი, რომ გაეროს გენერალურ ასამბლეაზე ჩვენი წარმომადგენელი გამოსულიყო და ოსი ხალხის პოზიცია და ხედვა გაეცნოთ გენერალურ ასამბლეისთვის", - ნათქვამია განცხადებაში.
