უზენაეს სასამართლოში გასამწესებლად პარლამენტისთვის წარდგენილი მოსამართლეებიდან ყველა არის ღირსეული და აკმაყოფილებს უზენაესი სასამართლოსთვის შესაბამის კრიტერიუმებს, – ამის შესახებ მოსამართლე ლევან მურუსიძემ იუსტიციის უმაღლესი საბჭოს წევრებთან გასაუბრებაზე განაცხადა.
მისი თქმით, ახლა მთავარი არის შემდეგი საკითხი, რომ სასამართლო არ უნდა გარიონ პოლიტიკურ პროცესებში.
„წინასწარ არ შეიძლება, მოსამართლეებზე თქვა, რომ არის უმსგავსო და შეუფერებელი. ესენი არ არიან სისხლის სამართლის დამნაშავეები, ესენი მოსამართლეები არიან. იმსახურებენ იმას, რომ მოუსმინონ მათ პოზიციას, დაუსვან ნებისმიერი მწვავე შეკითხვა. თუ საზოგადოებას დარჩება განცდა, რომ ეს მოსამართლეები არიან უღირსები და ვერ პასუხობენ უზენაესი სასამართლოს სტანდარტს, მაშინ დარწმუნებული ვარ, პარლამენტი მიიღებს ისეთ გადაწყვეტილებას, რომლის მიხედვითაც, ისინი მოსამართლეებად არ გამწესდებიან“, – განაცხადა ლევან მურუსიძემ.
ცნობისთვის, ირაკლი კობახიძემ გუშინ განაცხადა, რომ პარლამენტი უზენაესი სასამართლოს მოსამართლეთა დანიშვნის გადაწყვეტილებას მიმდინარე სესიაზე არ მიიღებს.
შეგახსენებთ, რომ იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.
