პროკურატურის ინფორმაციით, ზუგდიდის მე-6 საჯარო სკოლის დირექტორსა და ამავე სკოლის პერსონალზე განხორციელებული სავარაუდო ზეწოლის ფაქტებთან დაკავშირებულ განცხადებაზე ია კერზაიას შვილი, ბაჩანა შენგელია სამშაბათს, 25 დეკემბერს გამოიკითხება.

როგორც პროკურატურის მიერ გავრცელებულ ინფორმაციაშია ნათქვამი, ბაჩანა შენგელიამ საქართველოს პროკურატურას 19 დეკემბერს მიმართა და მის განცხადებაში დასახელებული გარემოებებისა და თანდართული დოკუმენტაციის საფუძველზე გამოძიების დაწყება მოითხოვა.

„შენგელიას, პროკურატურაში შემოტანილი განცხადების საფუძველზე, გენერალური პროკურატურიდან დღეს დაუკავშირდნენ, თუმცა მან განაცხადა, რომ ზუგდიდიდან თბილისში ჩამოსვლას და პროკურატურაში გამოცხადებას სამშაბათამდე ვერ შეძლებს.

ბაჩანა შენგელიამ საქართველოს პროკურატურას 19 დეკემბერს მომართა და მის განცხადებაში დასახელებული გარემოებებისა და თანდართული დოკუმენტაციის საფუძველზე გამოძიების დაწყება მოითხოვა“, – აღნიშნულია გავრცელებულ ინფორმაციაში.

ცნობისთვის, ზუგდიდის მე-6 საჯარო სკოლის დირექტორი, ია კერზაია9 დეკემბერს გარდაიცვალა.

ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.

მისი ჯანმრთელობის მდგომარეობა მას შემდეგ გაუარესდა, რაც სკოლაში გენერალური ინსპექცია შევიდა.

სკოლის დირექტორი ამბობდა, რომ სკოლაში ინსპექციის შესვლა არჩევნებს უკავშირდებოდა.

კერზაია აბობდა, რომ რაც დირექტორმა პედაგოგების საარჩევნო პროცესში უკანონოდ ჩართვაზე უარი თქვა, ანონიმური წერილის საფუძველზე ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა. შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი.