ჩრდილოეთ კორეის ერთადერთი ტელევიზიის წამყვანი ლი ჩჰუნ ჰი, რომელიც ცნობილია თავისი მელოდრამატული გამოსვლებით, ახალგაზრდა წამყვანით ჩანაცვლდება.
როგორც ჩრდილოეთ კორეაში ამბობენ „ვარდისფერი ლედის“ მწუხარე ტონი აღარ შეესაბამება ქვეყნის მაღალტექნოლოგიურ იმიჯს, რომელსაც ახალგაზრდა ლიდერი განაგებს.
75 წლის წამყვანი, რომელსაც ტრადიციული ჩაცმულობის გამო მეტსახელად „ვარდისფერი ლედი შეარქვეს, მსოფლიოს ჩრდილოეთ კორეაში მიმდინარე ამბებს ხან ტირილით, ხან სიცილით, ხან კიდევ აგრესიული რიტორიკით, ათწლეულების განმავლობაში ამცნობდა. მან მსოფლიოს თავი განსაკუთრებით მაშინ დაამახსოვრა, როდესაც ჩრდილოეთ კორეის ლიდერის კიმ ჩენ ირის გარდაცვალება ხმამაღალი და ხანგრძლივი ტირილით გამოაცხადა.
ლი ჩჰუნ ჰი, კორეის ცენტრალური ტელევიზიის ეკრანებზე, 40 წელია ჩანს. ის 1943 წელს ღარიბ ოჯახში დაიბადა. მიუხედავად იმისა, რომ მასზე ბევრი არაფერია ცნობილი, ჟურნალისტების მიერ მოძიებულ მასალებში აღნიშნავენ, რომ მისი კარიერის წინსვლა, კარგი წარმომავლობის დამსახურება იყო.
ის არასდროს არ მუშაობდა ჟურნალისტად, თუმცა ხელოვნების ინსტიტუტში შეისწავლილმა უნარებმა, ლაპარაკის უნიკალური სტილი ჩამოუყალიბა. ლი ჩხუნ ჰი ცნობილია თავისი ექსპრესიული ტემბრით და თეატრალური მანერებით. ლი ჩხუნ ჰის საყვარელი ფერი ვარდისფერია, თუმცა ის შავებში ჩაცმულიც უნახავთ. მაგალითად, ჩრდილოეთ კორეის რესპუბლიკის დამფუძნებლის კიმ ირ სენის გარდაცვლების გამოცხადებაზე, დიქტორს შავი კაბა ეცვა. იგივე მოხდა 17 წლის შემდეგ, როდესაც ბოლო გზაზე კიმ ჩენ ირს აცილებდნენ.
