"ლეიბორისტული პარტია" ბოლომდე ვიდგებით ჩვენი ხალხის გვერდით და ჩვენ მოვითხოვთ, დაუყოვნებლივ უნდა გადადგეს ეს ხელისუფლება, - ამის შესახებ "ლეიბორისტული პარტიის" ეროვნული პოლიტიკური კომიტეტის წევრმა ლეილა გაფრინდაშვილმა რუსთაველის გამზირზე მიმდინარე აქციაზე განაცხადა.
მისი თქმით, "ხელისუფლება, რომელიც 10 თვის ბავშვის ქვევრში ჩაახრჩობით მოვიდა, ის არ უნდა მართავდეს საქართველოს".
"ისინი ხალხისთვის არ მოსულან, მათ უნდათ მხოლოდ ქართველი ხალხის ფული, ქართველი ხალხი ღატაკი და გაუბედურებული, რომ ადვილად იყიდონ ისე, როგორც კარტოფილით და შაქრით მოინდომეს ქართველი ხალხის ყიდვა. ჩვენ ამის უფლებას არ მივცემთ. ივანიშვილი, რომელმაც გადაწყვიტა და არ უკადრებია ქვეყნად არავის, ისეთი რამეები აკადრა საქართველოს - მან დაანგრია საყდრისი, მან ღვინის ქვეყანა მარიხუანას ქვეყნად გადააქცია. ჩვენ, "ლეიბორისტული პარტია" ბოლომდე ვიდგებით ჩვენი ხალხის გვერდით და ჩვენ მოვითხოვთ, დაუყოვნებლივ უნდა გადადგეს ეს ხელისუფლება", - განაცხადა მან.
ცნობისთვის, რუსთაველის გამზირზე, გაერთიანებული ოპოზიციის აქცია მიმდინარეობს. შეკრებილები საპრეზიდენტო არჩევნების შედეგებს აპროტესტებენ და ვადამდელი საპარლამენტო არჩევნების ჩატარებას მოითხოვენ.
შეგახსენებთ, რომ საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა სალომე ზურაბიშვილმა გაიმარჯვა. გაერთიანებული ოპოზიციის კანდიდატმა გრიგოლ ვაშაძემ განაცხადა, რომ ის არჩევნების შედეგებს არ აღიარებს. საქართველოს ყოფილმა პრეზიდენტმა, მიხეილ სააკაშვილმა მომხრებს ქუჩაში გამოსვლისა და დაუმორჩილებლობისკენ მოუწოდა. გაერთიანებულმა ოპოზიცია ფილარმონიაში მომხრეებს შეხვდა და 2 დეკემბერს ფართომასშტაბიანი აქცია დაანონსა. მათ განაცხადეს, რომ არჩევნების შედეგებს არ აღიარებენ და ვადამდელი საპარლამენტო არჩევნების მოთხოვნით, 2 დეკემბერს, აქციას გამართავენ
“ევროპული საქართველოს“ ერთ-ერთმა ლიდერმა დავით ბაქრაძემ პარტიის სახელით დღეს განცხადება გააკეთა, რომ გაერთიანების "ძალა ერთობაშია" მიერ კვირას დაგეგმილ საპროტესტო აქციას არ შეუერთდება. მისი თქმით, საზოგადოება გაიზარდა და აჩვენა, რომ ცვლილებებისთვის აუცილებელი აღარ არის ქუჩა, რევოლუცია და ბარიკადი.
ევროპული საქართველოს განცხადების შემდეგ, სამაუწყებლო კომპანია რუსთავი 2-ის გენერალურმა დირექტორმა ნიკა გვარამიამ „ევროპული საქართველოს“ კაბინეტის პარტია უწოდა.
მოგვიანებით, ევროპული საქართველოს ლიდერმა გიგი უგულავამ განაცხადა, რომ ის მიდის აქციაზე.
