„ევროპული საქართველო“ დამოუკიდებელი პროკურორის ინსტიტუტისა და სპეციალური აუდიტის სამსახურის შემნის ინიციატივით გამოდის. პარტიის სტრატგეგიის შესახებ დავით ბაქრაძემ დღეს გამართულ ბრიფინგზე ისაუბრა.
მისი თქმით, დამოუკიდებელი პროკურორის ინსტიტუტისა და სპეციალური აუდიტის სამსახურის ხელმძღვანელებს ოპოზიცია, არასამთავრობო სექტორთან, ერთად წარადგენს.
„ამ ინსტიტუტის ერთადერთი ამოცანა საარჩევნო პერიოდში მუშაობა და ყველა იმ ფაქტის გამოძიება იქნება, რომელიც საარჩევნო პერიოდში ამომრჩევლის მოსყიდვას, შავი ფულის ბრუნვას და ადმინისტრაციული რესურსი გამოყენებას უკავშირდება. ნათელია, რომ დღევანდელი პროკურატურა და აუდიტის სამსახური, რომელიც კონტროლდება ხელისუფლების მხრიდან, ამას ვერ აკეთებს. სწორედ ამიტომ ჩვენი ინიციატივაა სპეციალური სტრუქტურების შექმნა საარჩევნო დამოუკიდებლობისთვის", - აღნიშნა დავით ბაქრაძემ.
ბაქრაძემ ასევე თქვა, რომ პარტია უახლოეს პერიოდში არასამთავრობო სექტორთან და ოპოზიციურ პარტიებთან გამართავს კონსულტაციებს, უცხოელ პარტნიორებთან კი უკვე ჰქონდათ.
"ჩვენი მთავარი ამოცანა იქნება ის, რომ შევქმნათ ქვეყანაში პოლიტიკური გარემო, სადაც ხალხს ექნება თავისუფალი არჩევანის გაკეთების საშუალება და მშვიდობიანად, მშვიდად, თავისუფალი არჩევნების გზით აირჩიოს ის ხელისუფლება, რომელიც მას სურს", - აღნიშნა დავით ბაქრაძემ.
