ბიძინა ივანიშვილის ნაყიდ საპრეზიდენტო სავარძელში ყოფნა, ღმერთმა დამიფაროს, - ასე უპასუხა „დემოკრატიული მოძრაობის“ ლიდერმა, ნინო ბურჯანაძემ გადაცემა „რეაქციაში“ ჟურნალისტ ინგა გრიგოლიას შეკითხვას - როცა გაიგო სალომე ზურაბიშვილის გამარჯვება, გულისწყვეტა ხომ არ ჰქონდა, რადგან შეიძლებოდა თავად ყოფილიყო მის ადგილას.
„არანაირად. ასეთი საპრეზიდენტო არჩევნების და ბიძინა ივანიშვილის ნაყიდ საპრეზიდენტო სავარძელში ყოფნა, ღმერთმა დამიფაროს. მე რომ მასეთი რამ მდომოდა, როგორმე მოვახერხებდი „ნაციონალურ მოძრაობასთან“ თავის დროზე, ბოლომდე პრობლემების მოგვარებას და სკამის შენარჩუნებას და ასევე, ივანიშვილთანაც მოვახერხებდი საერთო ენის გამონახვას. ნამდვილად, მინდა გითხრათ, არანაირად არ მშურს ქალბატონი სალომეს დღევანდელი მდგომარეობა. მე, ნამდვილად ვერ ავიტანდი იმას, რომ ჩემი სურათები ჩამოეხსნა ვინმეს და ჩემი გვარის თავზე, ბიძინა ივანიშვილის სურათი დაეხატა“, - განაცხადა ბურჯანაძემ და აღნიშნა, რომ გულის წყვეტა და ტკივილი აქვს იმასთან დაკავშირებით, რომ არც 2013-ში არც 2016-ში არ მიეცა იმის შესაძლებლობა, რომ ქართულ პოლიტიკაზე მოეხდინა რადიკალური ზეგავლენა.
„ერთადერთი თემა, რაზეც მე, ზოგადად მაქვს გულის წყვეტა და ტკივილი აირს ის რომ, არც 2013-ში, არც 2016-ში არ მომეცა იმისი შესაძლებლობა, რომ რეალურად ქართულ პოლიტიკაზე მომეხდინა რადიკალური ზეგავლენა. დარწმუნებული ვარ და დარწმუნებული ვიყავი, ძალიან ბევრი რამის შეცვლა შემეძლო. 2013 წელს მე რომ ვოყფილიყავი პრეზიდენტად არჩეული, დღეს სრულიად სხვა რეალობა იქნებოდა საქართველოში. სხვა იქნებოდა დამოკიდებულაბა აფხაზეთთან, სამაჩაბლოსთან. სხვა იქნებოდა დამოკიდებულება რუსეთთან. სხვა იქნებოდა და არანეგატიური სხვათა შორის, დასავლეთთან და არც „ნაციონალური მოძრაობა“ 40 პროცენტს არ მიიღებდა. ეს იმის ხარჯზე რომ მე ვიცი, როგორ უნდა ვაკეთო პოლიტიკა, იმის ხარჯზე რომ სკამის გამო, ყველაფერს არ დავთმობ და არაფერს არ დავთმობ, არაფერს გადავყლაპავ. იმის ხარჯზე, რომ მე მაქვს სერიოზული პოლიტიკური გამოცდილება, ნეგატიურიც და პოზიტიურიც და მაქვს იმის გამბედაობა გავაკეთი ის, რაზეც შეიძლება ძალიან ბევრ ადამიანს, ნეგატიური რეაცქია ჰქონდეს“, - განაცხადა ბურჯანაძემ.
