მე ვხელმძღვანელობ ამ ფორმულით განუხრელად, რომ საქართველოში ხელისუფლება შესაცვლელია, მაგრამ არა ნაციონალური მოძრაობით, - განაცხადა „შენების“ მოძრაობის ლიდერმა, დავით უსუფაშვილმა ტელეკომპანია "პირველის" გადაცემა „რეაქციაში“.
მისი თქმით, ვადამდელ პროპორციულ საპარლამენტო არჩევნებს ხელისუფლებას ურჩევდა და მოუწოდებდა პირველ ტურამდეც და მეორე ტურამდეც.
„ჩემი პოზიცია იყო ძალიან მარტივი, გამომდინარე, ჩემი ფორმულიდან პოლიტიკაში ბოლო ორი წლის განმავლობაში. მე ვხელმძღვანელობ ამ ფორმულით განუხრელად, რომ საქართველოში ხელისუფლება შესაცვლელია, მაგრამ არა ნაციონალური მოძრაობით. შესაბამისად, მე მხარს ვუჭერ იმ პროცესებს, რომელიც მიგვიყვანს ოცნების ერთპარტიული მმართველობის დასასრულამდე, მაგრამ მე მაქვს იქ მეორე პირობა, რომ ამ ერთმმართველობის დასასრული არ უნდა ნიშნავდეს „ნაციონალური მოძრაობის“ ხელისუფლებაში დაბრუნებას და კონკრეტულად, სააკაშვილის დაბრუნებას“, - განაცხადა უსუფაშვილმა.
