სრულიად მზად ვარ და ამ პროცესს ხვალიდან დავიწყებთ, - ამის შესახებ საქართველოს საპრეზიდენტო არჩევნებში გამარჯვებულმა სალომე ზურაბიშვილმა პრეზიდენტ გიორგი მარგველაშვილის დღევანდელ ბრიფინგთან დაკავშირებით განაცხადა.
როგორც ზურაბიშვილმა "ტვ პირველის" ეთერში აღნიშნა, გიორგი მარგველაშვილის მიმართვა დემოკრატიული ნაბიჯია, რისთვისაც ის მადლობელია.
„მოქმედი პრეზიდენტის მადლობელი ვარ, რომ მზადყოფნა გამოთქვა. ჩემთვის ძალიან მნიშვნელოვანია, პრეზიდენტის ადმინისტრაციის გადაბარება ძალიან დალაგებულად მოხდეს. ეს სწორი გადაწყვეტილება და დემოკრატიული მიდგომაა, რისთვისაც მადლობელი ვარ“, – განაცხადა ზურაბიშვილმა, რომელმაც აქვე აღნიშნა, რომ პირადად გიორგი მარგველაშვილთან შეხვედრასაც აპირებს.
ცნობისთვის, გიორგი მარგველაშვილმა პრეზიდენტის ადმინისტრაციაში გამართულ ბრიფინგზე განაცხადა, ის მზად არის, საქმის გადაბარებასთან და ინაუგურაციასთან დაკავშირებით სალომე ზურაბიშვილთან თანამშრომლობა დაიწყოს.
