ძალიან მნიშვნელოვანია, რომ დღევანდელი არჩევანი მშვიდობიან გარემოში ჩატარდა, ეს ჩვენმა სახელმწიფომ უზრუნველყო - განაცხადა სალომე ზურაბიშვილმა არჩევნების ეგზიტპოლების შემდეგ პირველი კომენტარი გააკეთა. მან მხარდამჭერებს მადლობა გადაუხადა. ეგზიტპოლების მიხედვით, ზურაბიშვილი საპრეზიდენტო არჩევნების მეორე ტურში ლიდერობს.
ზურაბიშვილის თქმით, ის ეცდება, რომ საერთო ენა გამონახოს იმ ადამიანებთან, ვინც მას დღეს ხმა არ მისცა.
„მოგესალმებით. მივესალმები მთელ საქართველოს, ყველა მოქალაქეს. მინდა, ყველას ვუთხრა, პირველ რიგში, რომ დღეს ძალიან მნიშვნელოვანი დღეა. დღეს ჩვენს ქვეყანაში გაკეთდა პრინციპული არჩევანი. ამ არჩევანს აქვს საქართველოსთვის, დღევანდელი საქართველოსთვის და ხვალინდელი საქართველოსთვის ძალიან დიდი მნიშვნელობა. ჩვენ ერთად ვთქვით საბოლოო და მტკიცე უარი წარსულზე, იმაზე, რაც ყველაზე მეტად შეფერხდება ჩვენი საზოგადოების გაძლიერებას, წინსვლას, გათავისუფლებას. ჩვენი არჩევანი მშვიდობიანი საქართველოა, თავისუფალი და თანასწორი მოქალაქეების ქვეყანა. ჩვენი არჩევანი საზოგადოების იმ ნაწილთან დიალოგია, ვინც დღეს ხმა არ მომცა და ვინც, ჩემი, ჩვენი თანამოაზრე დღეს არ არის. მაგრამ ჩვენ ყველანი ერთი ქვეყნის მოქალაქეები ვართ. ერთი პატარა ქვეყნის. ერთ სახელმწიფოში ვცხოვრობთ და უნდა ვიცხოვროთ და უნა გავამთლიანოთ და უნდა დავაწყნაროთ, უნდა დავამშვიდოთ. ამიტომ მე გპირდებით დღეს, რომ ყველაფერს ვიღონებ, რასაც შევძლებ იმისთვის, რომ ამას მივაღწიო, რომ ჩვენ გავერთიანდეთ. ძალიან მნიშვნელოვანია, რომ დღევანდელი არჩევანი მშვიდობიან გარემოში ჩატარდა, ეს ჩვენმა სახელმწიფომ უზრუნველყო,“- განაცხადა სალომე ზურაბიშვილმა.
