ამ არჩევნებში აგრესიული ფონი არ არის. ნუ შეეცდებით, ასეთი ფონი ხელოვნურად შექმნათ, - განაცხადა პარლამენტის თავმჯდომარემ, ირაკლი კობახიძემ და აღნიშნა, რომ, უამრავი სპეკულაციაა, რითაც საპრეზიდენტო არჩევნების მეორე ტურზე აგრესიული ფონი ხელოვნურად იქმნება.
ირაკლი კობახიძემ საარჩევნო პროცესის მიმდინარეობაზე ვაკის 53-ე საარჩევნო უბანზე ისაუბრა, სადაც საკუთარი არჩევანი გააკეთა.
„ყველას ვთხოვ, განსაკუთრებით „რუსთავი 2“-ს, აგრესიულ ფონს ხელოვნურად ნუ ქმნიან. ამ არჩევნებში აგრესიული ფონი არ არის. ნუ შეეცდებით, ასეთი ფონი ხელოვნურად შექმნათ. ამომრჩეველს იმის საშუალება უნდა მივცეთ, რომ ხმა მშვიდ გარემოში მისცეს. ეს თქვენი პასუხისმგებლობაცაა. უამრავი სპეკულაცია, რომლითაც აგრესიული ფონი ხელოვნურად იქმნება. ყველას მოგიწოდებთ, რომ მაღალი სამოქალაქო პასუხისმგებლობა გამოავლინოთ, მათ შორის, ეს არის კონკრეტული მედიასაშუალებების პასუხისმგებლობაც“, – აღნიშნა კობახიძემ და აღნიშნა, რომ დარღვევების ინდივიდვალური შემთხვევები ნეგატიურ ფონს ვერ ქმნის.
„მთლიანობაში არჩევნები ჯანსაღ, თანასწორ და სამართლიან გარემოში წარიმართება, რაც ჩვენი პასუხისმგებლობაა და მუშაობა მთელი დღის განმავლობაში ასე გაგრძელდება“, – განაცხადა კობახიძემ.
დღეს, 28 ნოემბერს, საქართველოში საპრეზიდენტო არჩევნების მეორე ტური მიმდინარეობს. საქართველოს მოქალაქეები ექვსწლიანი ვადით მეხუთე პრეზიდენტს აირჩევენ.მეორე ტურში ამომრჩეველთა საერთო რაოდენობა 3 528 658. ცესკოს მონაცემებით, პირველ ტურში ამომრჩეველთა რაოდენობა 3 518 877-ს შეადგენდა. არჩევნების ჩასატარებლად სრულ მზადყოფნაშია 3 703 საარჩევნო უბანი, მათ შორის 55 საზღვარგარეთ, 11 კი გამონაკლის შემთხვევაში შექმნილი უბანია.არჩევნებს აკვირდება საარჩევნო სუბიექტების 17 000-მდე წარმომადგენელი, 48 500-ზე მეტი ადგილობრივი და 1300-ზე მეტი საერთაშორისო დამკვირვებელი. საარჩევნო პროცესს გააშუქებს 2 300-მდე ჟურნალისტი. საპრეზიდენტო არჩევნების პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.
ეს ბოლო არჩევნები იქნება, როდესაც სახელმწიფოს მეთაურს პირდაპირი გზით აირჩევენ. პრეზიდენტის მიერ ფიცის დადების მომენტიდან კი კონსტიტუციის ახალი რედაქცია თავისი ერთ-ერთი წინააღმდეგობრივი ცვლილებით – პრეზიდენტის არაპირდაპირი არჩევის წესით, შევა ძალაში.
