საქართველოს პრეზიდენტმა, გიორგი მარგველაშვილმა გადაცემა „რეაქციაში“ ჟურნალისტ ინგა გრიგოლიას შეკითხვას უპასუხა, რატომ არ შეიწყალა საქართველოს ყოფილი პრეზიდენტი მიხეილ სააკაშილი. მარგველაშვილის თქმით, მიხეილ სააკაშვილს პატივი უნდა ეცა ამ ქვეყნის მოქალაქეებისთვის და არ დაეთმო საქართველოს მოქალაქეობა, პატივი ეცა ქართული სასამართლოსთვის და კითხვებზე პასუხი გაეცა.
„რატომ არ შევიწყალე სააკაშვილი... მე მგონია, რომ სააკაშვილის გზა, როგორც პრეზიდენტის გზა, არ არის რიგითი მოქალაქის გზა და ეს არაერთხელ მითქვამს ნათლად მისთვის. ბუნებრივია, ამაზე მოდიოდა, როგორც ყოველთვის, ზღვარგადასაული აგრესია, ნაციონალებისგან. სააკაშვილს არც მოქალაქეობა უნდა დაეთმო. იმიტომ რომ ორჯერ იყო ამ ქვეყნის პრეზიდენტი და უმაღლესი მთავარსარდალი. ამ ქვეყნის მოქალაქეებისთვის პატივი უნდა ეცა და საქართველოს მოქალაქეობა არ უნდა დაეთმო. მეორე - ქართული სასამართლოსთვის მას პასუხი უნდა გაეცა. იმიტომ რომ ამ ქვეყნის პრეზიდენტი იყო და როდესაც უსვამდნენ კითხვებს, ის ვალდებული იყო პასუხი გაეცა და პატივი ეცა იმ სასამართლოსთვის, რომლის მეშვეობით ათობით ათასი ადამიანი ციხეში გაუშვა. როგორ, ერთი წლის წინ ეს სასამართლო ხალხს ციხეში უშვებს და ერთი წლის შემდეგ შენ ღირსად არ თვლი რომ პასუხი გასცე? მე არ უნდა შემეწყალებინა, არანაირად“, - განაცხადა მარგველაშვილმა.
