საქართველოს ყოფილი პრეზიდენტი მიხეილ სააკაშვილი ვიდეომიმართვას ავრცელებს და საქართველოს მოსახლეობას მიმართავს. სააკაშილი ამბობს, რომ ხვალინდელი დღის შედეგზე დამოკიდებულია საქართველოს არსებობა, საქართველოს დამოუკიდებლობის ყოფნა-არყოფნა, საქართველოში ქართველების დარჩენა-არდარჩენა.
„საქმე იმაშია, რომ რუსეთიდან შემოგდებულმა ოლიგარქმა და ასევე რუსეთის ხელდასხმით დაყენებულმა კანდიდატმა უკვე გამოაცხადეს, რომ მათ უნდა გაასამართლონ ჩვენი სამხედროები საქართველოს დაცვისთვის, რომ ისინი მზად არიან, შექმნან საფუძველი საქართველოს ტერიტორიის ანექსიის აღიარებისა მსოფლიოს მიერ. ისინი ამტყუნებენ საქართველოს, ამის პარალელურად ოლიგარქმა დასახა გეგმები საქართველოს რკინიგზის, მთელი ელექტროსისტემის, ყველაფერი დანარჩენის, რაც ჯერ არ ჩაუდია ჯიბეში, ამის ჯიბეში ჩადების და თქვენი საბოლოოდ გაღატაკების და თქვენი ოჯახების მიწასთან გასწორების“, - ამბობს სააკაშვილი და განმარტავს, რომ ეს ნიშნავს, სალომე ზურაბიშვილის გამარჯვების შემთხვევაში საქართველოს დატოვებს კიდევ 1 მილიონი ყველაზე შრომისუნარიანი ქართველი, უკანმოუხედავად და ისინი ვეღარასდროს დაბრუნდებიან თავის ქვეყანაში.
„ასეთი დიდი საფრთხის წინაშე საქართველო არ მდგარა ძალიან დიდი ხნის განმავლობაში. ამიტომ, ახლა, ყველას გვმართებს ძალიან დიდი მობილიზაცია და დაფიქრება. რონალდ რეიგანმა თქვა, რომ ჩვენ ვართ ყოველთვის ამერიკა ერთი თაობის იქით, დამოუკიდებლობის და თავისუფლების დაკარგვამდე. საქართველო არის ერთ არჩევნების იქით, ერთი დღის იქით, თავისუფლების და დამოუკიდებლობის შესაძლო დაკარგვის საფრთხესთან. და ამ საფრთხის შეჩერება თითოეული ქართველის წმიდათაწმიდა ვალია. ამიტომ ხვალ წყდება საკითხი. ოლიგარქმა ქნა ყველაფერი, დაარიგა ხახვი, კარტოფილი, გატყუებთ, რომ გაწერთ საბანკო ვალებს, თუმცა არაფერს არ გაწერთ, უამრავი სხვა დაპირება, გემუქრებათ“, - ამბობს სააკაშვილი.
