(მსოფლიოში პირველი სტუდენტური მულტიდისციპლინური სამეცნიერო-პრაქტიკულ ღონისძიებათა ციკლი)
საქართველოში მალე დაიწყება ცნობილი ქართველი პოლიტიკური ფიგურების მიერ წარმოებული პოლიტიკის იმიტირებული სასამართლო პროცესები და, ამ შემთხვევაში, პიროვნება კი არა, არამედ პოლიტიკა წარდგება სამსჯავროზე. სტუდენტებისა და ექსპერტ პროფესორ-მენტორების მიერ წინასწარი პოლიტოლოგიური და სამართლებრივი შესწავლისა და ანალიზის შემდეგ, სტუდენტების მიერ განაწილებული იქნება მოსამართლის, მბრალმდებელისა და ადვოკატის ფუნქციები. იმიტირებული სასამართლო პროცესის შემდეგ კი ჟიური (სასამართლო კოლეგია) გამოიტანს განაჩენს, რამდენად შეესაბამებოდა პოლიტიკოსის (ხელისუფლების) პოლიტიკური საქმიანობა ქვეყნის ეროვნულ ინტერესებს.
ამჯერად, სამსჯავროზე პირველი წარდგება ბაგრატ V-ისა და გიორგი VII-ის მიერ წარმოებული პოლიტიკა. მათი მეფობის პერიოდში განხორციელდა ჩვენთვის აუნაზღაურებელი დანაკარგების მომტანი თემურლენგის შემოსევები, რაც საბოლოოდ საქართველოსათვის კატასტროფული შედეგით დასრულდა, განადგურდა ქართული გენოფონდი, დაიწყო ისეთი დაღმასვლა, რომ შედეგებს დღემდეც იმკის ქვეყანა. რამდენად შეესაბამებოდა საქართველოს მაშინდელი ხელისუფლების წარმოებული პოლიტიკა ქვეყნის ეროვნულ ინტერესებს, შეიძლებოდა თუ არა კატასტროფის თავიდან აცილება. განხილული იქნება მხოლოდ და მხოლოდ პოლიტიკა პოლიტოლოგიურ და სამართლებრივ ასპექტში და არა როგორც წარსული ცხოვრება ისტორიული კუთხით.
რიგს ელოდება: ნოე ჟორდანიას, ლავრენტი ბერიას, ერეკლე მეორეს, ზვიად გამსახურდიას, ედუარდ შევარდნაძის და სხვათა პოლიტიკა. ინტერესით მოელის საქართველო თუ სამსჯავროზე სტუდენტების მიერ როგორ შეფასდება მათი პოლიტიკა პოლიტიკური და სამართლებრივი კუთხით.
პროექტის თანახელმძღვანელი სტუ-ს სამართლისა და საერთაშორისო ურთიერთობათა ფაკულტეტის დეკანი, პროფესორი ირაკლი გაბისონია: სამეცნიერო კვლევის სხვადასხვა სპეციალობების თეორიულ-პრაქტიკული სინთეზისა და უნივერსალიზაციის პროცესში ჩართულია სხვადასხვა უმაღლესი სასწავლებლების სტუდენტები (ბაკალავრები, მაგისტრანტები, დოქტორანტები). დარწმუნებული ვარ ეს პროექტი ხელს შეუწყობს სტუდენტებში სათანადო პროფესიული უნარ-ჩვევების განვითარებას, მრავალმხრივად განვითარებული, კონკურენტუნარიანი, მაღალი დონის სპეციალისტის მომზადებას. ინოვაცია მოიცავს პოლიტიკის მეცნიერებების, სამართალმცოდნეობის, საერთაშორისო ურთიერთობების, ინფორმატიკისა და სხვ. სამეცნიერო კვლევის სპეციალობების თეორიულ-პრაქტიკულ სინთეზს.
პროექტის ავტორი და თანახელმძღვანელი, პოლიტიკის მეცნიერებათა დოქტორი, საქართველოს ტექნიკური უნივერსიტეტის პროფესორი ჰენრი კუპრაშვილი:
დამოუკიდებლობის გამოცხადების შემდეგ, თითქმის სამი ათეული წელია ჩვენი სახელმწიფო წელში სათანადოდ ვერ გაიმართა, ხშირად პოლიტიკოსები სახელმწიფო ინტერესებზე მაღლა პირად და პარტიულ ინტერესებს აყენებენ, რჩება შთაბეჭდილება, რომ ქვეყანა პარტიული ინტრიგების ტალახსა და ლაფშია ჩავარდნილი და ერთგვარად „ბუქსაობს“. ახალგაზრდები მიზეზების ძიებაში არიან. შესაბამისად მათ აინტერესებთ არა მხოლოდ თანამედროვე, არამედ განვითარების ყველა მნიშვნელოვან ისტორიულ მონაკვეთში საქართველოს ხელისუფლების მიერ წარმოებული პოლიტიკა. სურთ გაანალიზონ დადებითი და უარყოფითი სვლები, გაარკვიონ, რომელი სჭარბობდა სახელმწიფო ინტერესები თუ პირადი, უნდათ შეეჩვიონ სახელმწიფოებრივ აზროვნებას, ისწავლონ შეცდომებზე, რათა თვითონ აღარ გაიმეორონ.
პროექტი გულისხმობს აგრეთვე, მენტორებთან და სტუდენტებთან ერთად პოლიტიკური მოვლენის მყარი რაოდენობრივი მახასიათებელის, თვისობრივ ცვლილებებზე რაოდენობრივ მახასიათებელთა კავშირის დადგენის, პოლიტიკური მოვლენის პარამეტრიზაციის, პარამეტრის მნიშვნელობის, პოლიტიკის ხარისხის, საქართველოს ეროვნული ინტერესების განსაზღვრის არგუმენტირებული კრიტერიუმების და პარამეტრების, მათი მნიშვნელობის, ზღვრულობის პროცენტული გამოსახულების, წონადობის დადგენის კვლევით პროცესებს.
პირველი სამსჯავრო გაიმართება 2018 წლის 13 დეკემბერს.
საქართველოს ტექნიკური უნივერსიტეტის სამართლისა და საერთაშორისო ურთიერთობის ფაკულტეტის მულტიდისციპლინურ სამეცნიერო-პრაქტიკულ პროექტში მონაწილეობის მისაღებად, ამჟამადაც მიმდინარეობს სტუდენტების (ბაკალავრები, მაგისტრანტები, დოქტორანტები) რეგისტრაცია სხვა იმიტირებული სასამართლო პროცესების მოსამზადებლად.
