არ შეიძლება, მხეცობებს გადაცდომა და შეცდომა დაარქვა - ამის შესახებ ფილოლოგმა ლევან გიგინეიშვილმა პირველი არხის გადაცემაში „საპრეზიდენტო არჩევნები 2018“ განაცხადა.
„ეს ხომ არ არის იმ საშინელი რეალობის ევფემიზმებით ჩანაცვლება?! ისმის – შეცდომები გვქონდა, შეგვეშალა, მაგრამ ახლა შეგვიძლია, ხელისუფლებაში ისევ მოვიდეთ და გავაგრძელოთ. ძალადობისა და მხეცობის უამრავი ფაქტი იყო, მაგრამ იგივე აბდალაძის საქმე რომ ავიღოთ, როცა ჟურნალისტს ახლობელს მიუყვან და ეტყვი, თუ ტყუილ ჩვენებაზე ხელს არ მოაწერ, მას უწამებ, უკაცრავად, მაგრამ ეს შეცდომა არ არის. ეს რაღაც ევფემიზმია, რეალობის ორველური ენით ჩანაცვლება, ორველური ენით ჩანაცვლება იმ ენის, რომელიც ამას უნდა მიუყენო და ნამდვილი ენა რომ მიუყენო, უნდა თქვა, რომ ეს შეცდომა კი არა, დანაშაულია“, – განაცხადა გიგინეიშვილმა.
მისი თქმით, ორველური ენის გამოყენებით, რეალობისთვის სხვა სახელის დარქმევა ხდება, რომ ამ რეალობის მნიშვნელობა ადამიანთა წარმოდგენაში გაცვითონ, ხოლო თუ იტყვი, რომ ეს ყველაფერი დანაშაული იყო, მაშინ უფლება აღარ გაქვს, პოლიტიკაში მოხვიდე.
