გაცოცხლდნენ, გამოვიდნენ სარდაფებიდან? ამ ინიციატივაზე საუბარი არჩევნებამდეც იყო, არანაირი კავშირი არ აქვს არჩევნებთან, - ასე ეხმიანება თბილისის მერი კახა კალაძე არასამთავრობო ორგანიზაციების კრიტიკულ განცხადებას, რომელიც 600 000 მოქალაქისთვის სასესხო დავალიანების განულებას შეეხება.
„გაცოცხლდნენ, გამოვიდნენ სარდაფებიდან? ამასთან დაკავშირებით დიდი ხნის განმავლობაში მიდიოდა საუბარი. სანამ არჩევნების თარიღი გამოცხადდებოდა, მანამდე იყო საუბარი. ამაზე საუბრობდა პარტიის თავმჯდომარე, როდესაც ის შემობრუნდა პოლიტიკაში. ძალიან მიხარია, რომ პრობლემა, რომელიც 600 ათასზე მეტ ადამიანს აწუხებდა, მოიხსნება. ძალიან რთულია, დაუკავშირო არჩევნებს. პირველ ტურში რომ დამთავრებულიყო არჩევნები და მერე რომ გამოცხადებულიყო ეს გადაწყვეტილება, მაშინ რას იტყოდნენ? არანაირი კავშირი არ აქვს, თუმცა თუ არის კითხვები რაიმე კითხვები, შესაბამისი სამსახურები დაინტერესდებიან, ალბათ“, – განაცხადა კახა კალაძემ ჟურნალისტებთან საუბრისას.
პრემიერ-მინისტრის მიერ გამოცხადებულ მთავრობის ინციატივასთან დაკავშირებით, რომლის მიხედვითაც 600 000 მოქალაქეს 2000 ლარამდე ვალი გაუნულდება და მოვალეთა ე.წ. შავი სიიდან ამოიშლება, კითხვები აქვს არასამთავრობო სექტორს. ორგანიზაციების ერთობლივ განცხადებაში წერია, რომ აღნიშნული ინიციატივა, რომელიც ფონდი „ქართუს” მიერ განხორციელდება, სავარაუდოდ, წარმოადგენს ამომრჩეველთა მოსყიდვის უპრეცედენტო შემთხვევას, რომლითაც სამართალდამცავი ორგანოები უნდა დაინტერესდნენ.
არასამთავრობო ორგანიზაციები: არასამთავრობო ორგანიზაციები „საქართველოს ახალგაზრდა იურისტთა ასოციაცია“, „საერთაშორისო გამჭვირვალობა-საქართველო“ და „სამართლიანი არჩევნებისა და დემოკრატიის საერთაშორისო საზოგადოება“ საქართველოს პროკურატურას მოუწოდებენ, დროულად და ობიექტურად გამოიძიოს და შესაბამისი სამართლებრივი რეაგირება მოახდინონ აღნიშნულ ინიციატივასთან დაკავშირებით.
