„ერთიანი ნაციონალური მოძრაობის“ პოლიტიკური საბჭოს წევრის, ნიკა რურუას შეფასებით, მსგავსი შინაარსის ბანერების გაკვრა მოსახლეობის დაშინებას და მათით მანიპულირებას ემსახურება. მისი თქმით, "ქართული ოცნება" დაკავებულია საბჭოთა ტიპის კამპანიით და ამას საარჩევნო ბილბორდებიც ცხადყოფს.
„მთავარი შეცდომა, რასაც ოცნება უშვებს ყოველთვის, ეს არის ტემპერატურის ისე აწევა, რომ მერე მისი დაწევა თვითონ არ შეუძლიათ და ეს, რა თქმა უნდა, კონტრპროდუქტიულია. მთელი იმ ნეგატიური, საძაგელი, საბჭოთა ტიპის კამპანიით, რომელსაც აწარმოებენ ეს ბილბორდებიც ცხადყოფს. თვითონაც ახლა, ბევრმა ხალხმა ურჩია და ფიქრობენ, ჩამოხსნან. მაგრამ ამას მნიშვნელობა არ აქვს, ეს არის ტიპიური პუტინისტრუ-ჩეკისტური სიძულვილის ენაზე დაფუძნებული კამპანია, რომელსაც არაფერი არ აქვს ხალხის რეალურ პრობლემებთან საერთო და არის ხალხის მანიპულაციაზე, დაშინებაზე გათვლილი“, - განაცხადა ნიკა რურუამ.
თბილისის ქუჩებში ახალი აგრესიული შინაარსის ბანერები გამოჩნდა. ბანერზე მიხეილ სააკაშვილის, ზურაბ ადეიშვილის, ბაჩო და დათა ახალაიების, მეგის ქარდავას, ვანო მერაბიშვილისა და ნიკა გვარამიას ფოტოებია გამოსახული. მოგვიანებით გაირკვა, რომ ბანერების დამკვეთი წინანდლის ღვინის ქარხნის მფლობელი ალექსანდრე მეგუთნიშვილია.
