„ქართულ ოცნებას“ შმორის სუნი ასდის, აი, ასეთი ქმედებების შემდეგ. ჩვენი პარტიისთვის ყოველი ადამიანი ძვირფასია, მაგრამ ამ ბრძოლაში იწრთობა პარტია, რომელიც ჯერ კიდევ ორი წლისაა და რაც არ კლავს ყველაფერი გაძლიერებს", - ასე გამოეხმაურა ბათუმშ გამართულ ბრიფინგზე "ევროპული საქართველოს" ერთ-ერთი ლიდერი გიგი უგულავა პარტიის აჭარის რეგიონულმა ხელმძღვანელის რაულ თავართქილაძის განცხადებას პარტის დატოვების შესახებ.
"დღეს გავრცელდა ინფორმაცია, რომ რაულ თავართქილაძემ და რამდენიმე ჩვენმა უკვე ყოფილმა კოლეგამ დატოვეს „ევროპული საქართველო“. ძალიან სავალალოდ გამოიყურებოდა ის ბრიფინგი რაც მე ვნახე. ძალიან სამწუხაროა, როდესაც ადამიანები ესე უტიფრად იტყუებიან. ჩვენ ვნახეთ ხუთჯერ ჩაწერილი დუბლი, ჩვენ ვნახეთ ადამიანი შეშინებული და ნირწამხდარი, ჩვენ ვნახეთ ადამიანი, რომელსაც ეტყობოდა პირდაპირ, ფიზიკურად ეტყობოდა „სუსის“ კვალი და ეტყობოდა „ქართული ოცნების“ დაწერილი ტექსტი. ჩვენ ვიმყოფებით ძალიან რთულ ბრძოლაში. ბატონი რაულისთვის ისევე როგორც დანარჩენებისთვის კარგად იყო ცნობილი, ჯერ კიდევ 5 თვის წინ, როდესაც „ევროპულმა საქართველომ EPP-ის ფარგლებში ხელი მოაწერა შეთანხმებას ენმ-სთან ურთიერთთანამშრომლობის მემორანდუმს, რომლის მიხედვითაც ჩვენ ორი პარტია ვიღებდით და ავიღეთ ვალდებულება იმისათვის, რომ მეორე ტურში გასული კანდიდატისთვის მხარი დაგვეჭირა. მეტიც, ბატონი თავართქილაძე, უკვე პირველი ტურის დასრულებისთანავე, თავად მონაწილეობდა პოლიტსაბჭოს სხდომაში, სადაც პოლიტსაბჭომ მხარი დაუჭირა ჩვენს ამ გადაწყვეტილებას. მეტიც, მთელი ამ ორი კვირის განმავლობაში ბატონი თავართქილაძე და ჩვენი ყოფილი კოლეგები თავად მონაწილეობდნენ ერთობლივ პროცესში, რასაც ჰქვია არა სალომე ზურაბიშვილს. ამიტომ მის მიერ წაკითხული ტექსტი მეტყველებს მასზე და მხოლოდ „ქართულ ოცნებაზე“. როგორ აფუჭებს მორალურად, ზნეობრივად, კაცურად როგორ აფუჭებს ადამიანებს. „ქართულ ოცნებას“ შმორის სუნი ასდის, აი, ასეთი ქმედებების შემდეგ. ჩვენი პარტიისთვის ყოველი ადამიანი ძვირფასია, მაგრამ ამ ბრძოლაში იწრთობა პარტია, რომელიც ჯერ კიდევ ორი წლისაა და რაც არ კლავს ყველაფერი გაძლიერებს. მე დარწმუნებული ვარ, რომ ის ცვლილებები რაც აქ აჭარაში, ჩვენს პარტიაში განხორციელდება, მხოლოდ საერთო საქმეს დაეხმარება და საერთო საქმეში შეიტანს წვლილს", - განაცხადა გიგი უგულავამ.
შეგახსენებთ, რომ დღეს, “ევროპული საქართველოს” აჭარის ორგანიზაციის წევრებმა პარტია დატოვეს.
