შევხვდი ამერიკის მოვალეობის შემსრულებელს, რომელიც ახლახან ჩამოვიდა საქართველოში, 2 კვირაა თუ არცკი, რომელსაც ჰქონდა მანამდე მხოლოდ ოფიციალური შეხვედრები მთავრობასთან და პირველი მე შემხვდა, რომ მესაუბრა საარჩევნო გარემოზე, - ამის შესახებ "ქართული ოცნების" მხარდამჭერილმა პრეზიდენტობის კანდიდატმა სალომე ზურაბიშვილმა აშშ-ის ელჩის მოვალეობის შემსრულებელ როს უილსონთან შეხვედრის შემდეგ განაცხადა.
მისი თქმით, ის ელჩს საარჩევნო კამპანიაზე ესაუბრა.
„მე ავუხსენი, რა მდგოამრეობაში დაიწყო საარჩევნო კამპანია, რა იყო ჩემი მოწოდება, რომ ეს ყოფილიყო ევროპული და დასავლური ტიპის კამპანია, როგორ გადაიქმნა ეს კამპანია ბევრად უფრო ბნელ საბჭოთა კამპანიად, ვიდრე ის, რასაც მე ვისურვებდი. და ამის შესახებ ძალიან ბევრი დეტალები გავაცნე მე მას, თუნდაც ის ბოლოდროინდელი მუქარები, რომლებიც მათ შორის, ეხება ჩემს ქალიშვილს, რომელიც ასევე ამერიკის მოქალაქეა და ეს მისთვის აუცილებლად სათქმელი იყო, რომ სცოდნოდა“, - განაცხადა სალომე ზურაბიშვილმა, რომელმაც აქვე აღნიშნა, რომ ის როს უილსონს იმ პრიორიტეტებსა და პოზიციაზეც ესაუბრა, რაც პრეზიდენტად არჩევის შემთხვევაში ექნება.
