მე მივედი რუსთაველზე ზაზა სარალიძის და მალხაზ მაცალიკაშვილის სანახვად. მე ადრეც ვიყავი, უბრალოდ პირადად მათთან არ მივსულვარ, - ამის შესახებ “დემოკრატიული მოძრაობის” ერთ-ერთმა ლიდერმა ნინო ბურჯანაძემ გადაცემა “რეაქციაში” განაცხადა კითხვაზე, სარალიძის და მაჩალიკაშვილის აქციაზე მისი მისვლა ნიშნავს, რომ “ქართული ოცნების” საწინააღმდეგოდ პოზიციონირებს?
„მივედი იმიტომ, რომ ხელისუფლება და სახელმწიფო ამ ადამიანებს ებრძვის. მეორდება ძალიან დიდი უსამართლობა. “ქართული ოცნება” , ნამდვილად, ძალიან დამნაშავეა ამ ადამიანების წინაშე. "ქართულმა ოცნებამ” იკადრა ის, რაც არ უკადრია არც ერთ ხელისუფლებას, როცა შვილმკვდარი მშობლები დააპირისპირა ერთმანეთს. ჩემთვის არ არსებობს განსხვავება, ისევე როგორც შევარდნაძის დროს ომში დაღუპულ ჯარისკაცებსა და სააკაშვილის დროს ომში დაღუპულ ჯარისკაცებს შორის არ არსებობს სხვაობა. ჩემთვის ყველა დაღუპული ჯარისკაცი ერთნაირია და ერთნაირად მტკივნეულია. ჩემთვის არ არსებობს, ადამიანი, რომელიც მოკლეს სააკაშილის ხელისუფლების დროს და რომელიც მოკლეს ბიძინა ივანიშვილის ხელისუფლების დროს. განცხადებები, რომ კეთდება, კი ბატონო, საწყალი, სარალიძის ბავშვი ნამდვილად ახალგაზრდების ჩხუბს შეეწირა, თუმცა ხელისუფლებამ საოცარი უსამართლობა ჩაიდინა, როდესაც ხელი დააფარა მკვლელს და არ გამოიძია ამ უბედური ბავშვის სიკვდილი, მაგრამ მაჩალიკაშვილის შვილი ხელისუფლებამ არ მოკლა?!” – განაცხადა ნინო ბურჯანაძემ და აღნიშნა, რომ გააგრძელებს მხარდაჭერას, როგორც სარალიძის, ასევე მაჩალიკაშვილის.
„ნამდვილად გავაგრძელებ მხარდაჭერას როგორც სარალიძის, ასევე ბატონო მაჩალიკაშვილის მიმართ და ყველა იმ ადამიანის მიმართ, ვინს უსამართლოდ არის დაჩაგრული“, - განაცხადა ბურჯანაძემ.
