დამოუკიდებელი და მმართველი პარტიის, „ქართული ოცნების“ მიერ მხარდაჭერილი საპრეზიდენტო კანდიდატი, სალომე ზურაბიშვილი ემიგრანტებს მიმართავს.
სალომე ზურაბიშვილის ვიდეომიმართვა მის ოფიციალურ ფეისბუქგვერდზე გავრცელდა.
მიმართვის ტექსტს უცვლელად გთავაზობთ:
„მოგესალმებით, მოგმართავთ უცხოეთში მცხოვრებ თანამემამულეებს, მოგმართავთ, როგორც მე თვითონ ემიგრაციაში დაბადებული და გაზრდილი ქართველი, როგორც სამშობლოში დაბრუნებული მოქალაქე და ბოლოს, როგორც თქვენი მომავალი პრეზიდენტი. მე ვიქნები თქვენს გვერდით და პირველივე დღიდან თქვენი ინტერესების დამცველი საპრეზიდენტო რანგში, როგორც ვიყავი საპარლამენტო ტრიბუნიდან. თქვენ იცით, რომ ხუთი წლის წინ დავიწყეთ მე და სხვა ემიგრანტებმა ბრძოლა, იმისათვის, რომ შეცვლილი ყოფილიყო კონსტიტუციაც და კანონმდებლობაც, რომელიც გვიკრძალავდა ორმაგ მოქალაქეობას. ეს ბრძოლა შედეგიანად დასრულდა. დღეს უკვე კონსტიტუცია შეცვლილია.
მინდა თქვენ გაგიზიაროთ ჩემი ხედვა დიასპორულ საკითხებთან მიმართებაში, პირველ რიგში ის, რომ საქართველოდან გასული დროებით თუ მეტი ხნით, ლეგალური თუ არელეგალური თანამემამულეები წარმოადგენენ ჩვენი მოსახლეობის ერთ მეოთხედს, თუ არა ერთ მესამედს. უცხოეთში მაცხოვრებელი თუ დაბადებული ბავშვები კი 200 ათასს. ეს იმას ნიშნავს, რომ ეს წარმოადგენს ქვეყნისთვის ერთ-ერთ მთავარ გამოწვევას და ჩვენ წინ დგას საკითხი თუ როგორ შეიქმნას ხვალინდელი თქვენი დაბრუნდების ღირსეული პირობები და შესაბამისად როგორ გაძლიერდეს დღესვე თქვენთან კავშირები. კავშირი ნიშნავს, პირველ რიგში, ჩვენი ქვეყნისთვის ენის და კულტურის შენარჩუნებას. ეს მოითხოვს გაძლიერებას ყველა იმ ინსტრუმენტის რომელიც ამას ემსახურება, ანუ საკვირაო სკოლები, დისტანციური სწავლება, საზაფხულო ბანაკები, სტაჟირების საშუალებები, გაცვლითი პროგრამები. ამ ყველაფერზე და ამ ყველა ინსტრუმენტების გაძლიერებაზე იზრუნებს პრეზიდენტი და პრეზიდენტის ადმინისტრაცია.
კავშირი უნდა ასევე გამოიხატებოდეს პოლიტიკურ ჩართულობაში. საკმაოდ დამაფიქრებელია ის ფაქტი, რომ ჩვენი დაახლოებით 1,5 მლნ ემიგრანტიდან მხოლოდ 45 000 თუ არის დარეგისტრირებული და მათ შორის ძალიან ცოტამ მიიღო არჩევნებში მონაწილეობა. ეს ციფრები იმის მანიშნებელია, რომ არსებობს ერთგვარი გულგრილობა ქვეყნის შიგნით მოვლენების განვითარების მიმართ და საჭიროა, რომ გაძლიერდეს სწორედ თქვენი პოლიტიკური ჩართულობა.
კავშირი ასევე ნიშნავს ეკონომიურ კავშირს. დღეს არსებობს ერთი ძალიან ძლიერი კავშირი, ეს არის თქვენი ტრანსფერები, რომელიც ეხმარება თქვენს ოჯახებს და სახელმწიფოს. მაგრამ საჭიროა ასევე რომ გაჩნდეს სხვა ფორმები ეკონომიკური კავშირებისა და მოგეცეთ თქვენ, ვისაც ამის შესაძლებლობა გააჩნია, საშუალება იმისი, რომ ჩაერთოს ქვეყნის ეკონომიკაში, ქვეყნის განვითარებაში თქვენი თუნდაც მცირე ინვესტიციების სახით. ბევრი ინიციატივა შეიძლება იყოს მიღებული სახელმწიფოსგან, რომელშიდაც ყველაში პრეზიდენტი მონაწილეობას მიიღებს.
მე მინდა ასევე გესაუბროთ იმ ინციატივების შესახებ, რომელზეც იმუშავებს საპრეზიდენტო ადმინისტრაცია და პრეზიდენტი.
ერთი ასეთი ინიციატივა არის ადმინისტრაციასთან არსებული საკოორდინაციო საბჭო ემიგრანტულ ორგანიზაციებთან ერთად, რომელშიც საპატრიარქო უნდა იყოს ჩართული.
არის დიასპორის სახლის შექმნის ინიციატივა, სადაც უნდა იყოს ყველა ის საჭირო ინფორმაცია, რაც თქვენ შეიძლება დაგჭირდეთ დაბრუნების დროს, ან თუ აქ ჩამოდიხართ დროებით, ან სასწავლებლად, ასევე დისტანციური სერვისი, რომელიც მოგცეთ ერთი ფანჯრის ფორმით საშუალებას, რომ გარედანაც მიიღოთ ყველა საჭირო ინფორმაცია ქვეყნის შესახებ.
მინდა, როგორც მომავალმა პრეზიდენტი გითხრათ, რომ ყველაფერს გავაკეთებ, რათა თქვენ იგრძნოთ, რომ ეს ქვეყანა თქვენია, პრეზიდენტი თქვენია, თქვენი დაბრუნება და ქვეყნის განვითარებაში თქვენი ჩართვა, არის უმაღლესი ჩვენი ერთობლივი მიზანი. მჯერა, რომ თქვენ ბევრად აქტიურად მიიღებთ მონაწილეობას მეორე ტურში, რადგან ახლა საუბარია იმაზე, რომ ეს უნდა იყოს თქვენი პრინციპული არჩევანი. საქართველო დგას გზაგასაყარზე, თქვენ თუ გსურთ, რომ ხვალინდელი საქართველო, ის საქართველო სადაც თქვენ უთუოდ დაბრუნდებით, იყოს ისეთივე ევროპული, დემოკრატიული, განვითარებული, როგორც ის ქვეყნები, სადაც დღეს ცხოვრობთ, აუცილებელია, ჩაერთოთ არჩევნებში და გააკეთოთ ის პრინციპული არჩევანი როგორც ჩვენ აქ ხვალ გავაკეთებ", - განაცხადა ზურაბიშვილმა.
