კარგი იქნება, სალომე ზურაბიშვილი ჩვენს ანგარიშებს გაეცნოს, სანამ პრეტენზიები ექნება, - ამის შესახებ "საერთაშორისო გამჭვირვალობა - საქართველოს" აღმასრულებელმა დირექტორმა, ეკა გიგაურმა ჟურნალისტებს განუცხადა.
მისი განმარტებით, ყველა ის ფაქტი, რაც წინასაარჩევნო პერიოდში გამოვლინდა, მათ შორის სალომე ზურაბიშვილზე თავდასხმები, არასამთავრობო ორგანიზაციის ანგარიშებში აისახა.
რაც შეეხება ზურაბიშვილსა და მისი ოჯახის წევრებზე სავარაუდო მუქარას, გიგაურის თქმით, ამაზე სამართალდამცველმა უწყებებმა ეფექტური და დროული გამოძიება უნდა ჩაატარონ.
"რაც შეხება თვითონ ამ ფაქტს, რა თქმა უნდა, ეს არის დასაგმობი. ჩემთვის განსაკუთრებით ეს არის სენსიტიური, რადგან მეც ვარ თავდასხმების ობიექტი და ზუსტად ვიცი, ქალბატონი სალომე რას გრძნობს. ამიტომ მნიშვნელოვანია, რომ მან მიმართა სამართალდამცავ უწყებებს, მათ დაიწყეს გამოძიება და უახლოეს ვადებში უნდა დაადგინონ ის ადამიანები, რომლებიც მას და მისი ოჯახის წევრებს ემუქრებოდნენ. ეს არის ძალიან მნიშვნელოვანი იმისთვის, რომ ჩვენმა მოქალაქეებმა იცოდნენ, რომ შესაძლოა კონკრეტულ პირებს, პოლიტოკოსებს ისინი არ დაეთანხმონ, მაგრამ არავითარ შემთხვევაში თავს არ უნდა დაესხან და არ განახორციელონ მათზე ზეწოლა და მუქარა. ამისთვის მნიშვნელოვანია, რომ სამართალდამცავი უწყებებიც იყვნენ ეფექტურები", - განაცხადა გიგაურმა.
ცნობისთვის, სალომე ზურაბიშვილმა დღეს ბრიფინგი გამართა, სადაც განაცხადა, რომ მას და მის შვილებს სიცოცხლის მოსპობით ემუქრებიან. მისივე თქმით, ბოლო დღეებში, კერძოდ, 9, 10 და 11 ნოემბერს მისი და მისი შვილების მისამართით განხორციელდა ესემეს და ხმოვანი შეტყობინებები, სადაც მისივე თქმით, ნათლადაა გამოთქმული სიცოცხლის მოსპობის მუქარა.
