ძალიან კარგი იქნება თუკი ლუსტრაციის კანონს მიიღებენ, მაგრამ "ქართული ოცნება" და პარლამენტი რომ განახევრდეს უცებ, მერე რა უნდა ვქნათ?! - ამის შესახებ ფრაქცია "ნაციონალური მოძრაობის" თავმჯდომარე რომან გოცირიძემ საპარლამენტო უმრავლესობის დეპუტატის, ლევან კობერიძის იდეასთან დაკავშირებით განაცხადა, რომელიც ინიციატივით გამოდის, რომ ლუსტრაციის კანონი იქნას მიღებული.
მისი თქმით, საბჭოთა წარსულისთვის სახელის დარქმევა კი არ არის საჭირო, არამედ საბჭოთა წარსულის გადმონაშთები უნდა ამოიძირკვოს პოლიტიკიდან.
„დარწმუნებული ვარ, ამ კანონს არ მიიღებენ, რადგან მათთვის ხელსაყრელი არ არის, მაგრამ საბჭოთა წარსულისთვის სახელის დარქმევა კი არ არის საჭირო, არამედ საბჭოთა წარსულის გადმონაშთები უნდა ამოიძირკვოს პოლიტიკიდან. ერთმანეთის მიყოლებით სულელურ განცხადებებს აკეთებენ. თურმე გენერალს არ აქვს უფლება სამხედრო ფორმით გააკეთოს განცხადება. საკუთარი აგენტის ფორმიანი განცხადება მისაღებია და გმირი გენერლის განცხადება მიუღებელი? ეს მაჩვენებელია ერთი რამის, წინასაარჩევნოდ ხელისუფლება არის პანიკაში და დგამს ერთმანეთზე წამგებიან ნაბიჯებს", - განაცხადა რომან გოცირიძემ.
„ლუსტრაციის კანონი! სასწრაფოდ ! იმისათვის, რომ საქართველოს პოლიტიკურ ცხოვრებაში საბოლოოდ დავემშვიდობოთ საბჭოთა წარსულს, იმისათვის, რომ დაერქვას ყველაფერს თავისი სახელი, იმისათვის, რომ მომავალმა თაობებმა შეძლონ უკეთესი საქართველოს შენება, იმისათვის, რომ ქვეყანამ იაროს პროგრესის გზით, პარლამენტში ვაპირებ ინიცირება გავუკეთო კანონპროექტს ლუსტრაციის შესახებ - მივმართავ კოლეგა დეპუტატებს, შემომიერთდნენ და ერთად გადავდგათ ეს ნაბიჯი“, - დაწერა ლევან კობერიძემ სოციალურ ქსელში.
