დესტაბილიზაცია რომ მდომოდა, ჩემი შვილის მკვლელებს ჩემი შვილის საფლავზე დავაკლავდი და ეს შინაგან საქმეთა მინისტრმა კარგად უნდა გაითვალისწინოს, - ამის შესახებ შს მინისტრის, გიორგი გახარიას დღევანდელ განცხადებათან დაკავშირებით, ხორავას ქუჩაზე მოკლული დავით სარალიძის მამამ, ზაზა სარალიძემ განაცხადა.
მისი თქმით, დესტაბილიზაციის მოწყობა ხელისუფლებას თავად სურს.
„ფართო პოლიტიკური ინტერესების ხომ აქვთ თვითონ?! რატომ არ არიან დასჯილები ჩემი შვილის მკვლელები, როდესაც გახარიას უწყებას მზად აქვს ყველანაირი საბუთი და ყველა დოკუმენტი მის დასაკავებლად?! რატომ იცავს „ქართული ოცნება“ და მისი მთავარი ივანიშვილი ჩემი შვილის მკვლელებს და რატომ ისვრიან ტალახს ჩემსკენ?! ე.ი. დესტაბილიზაციის მოწყობა თავად სურს ხელისუფლებას. დესტაბილიზაციის მოწყობა რომ გვინდოდეს, აქ კი არ ვიდგებით, ამ ყინვაში, ვიცი სადაც უნდა წავიდე და როგორც უნდა ვიმოქმედო და აზრზე მოვიდნენ ჯობია!“, - განაცხადა სარალიძემ, რომელმაც აქვე აღნიშნა, რომ აქციები გაგრძელდება, სანამ მათი მოთხოვნები არ დაკმაყოფილდება.
ცნობისთვის, გიორგი გახარიამ დღეს განაცხადა, რომ პოლიციას ჰქონდა კონკრეტული ინფორმაცია დესტაბილიზაციის შესახებ და აქედან გამომდინარე იმოქმედეს მოქალაქეების უსაფრთხოების შესაბამისად.
