სამაგიდო სიები, რომლებიც უნდა იყოს დალუქული, შენახული და შემდეგ უნდა განადგურდეს, რადგან შეიცავს პერსონალურ ინფორმაციას, თითქმის ყველა საოლქო საარჩევნო კომისიიდან ამოიღეს და ჩვენი ინფორმაციით, წაიღეს სუს-ში მაქინაციების ჩასატარებლად, - ამის შესახებ გაერთიანებული ოპოზიციის „ძალა ერთობაშია“ საარჩევნო შტაბის ხელმძღვანელმა გიორგი ვაშაძემ განაცხადა.
მისი თქმით, ამ ყველაფერზე პერსონალურ მონაცემთა ინსპექტორს უნდა ჰქონდეს რეაგირება, რადგან საქმე გვაქვს პერსონალური ინფორმაციის გავრცელებასთან, ხოლო ცესკო-მ უნდა გადააყენოს ყველა იმ საოლქო საარჩევნო კომისიის წევრები, ვინც ამ მაქინაციას და კანონდარღვევას ჩადის.
„ჩვენ გვაქვს ამ ყველაფრის დამადასტურებელი ვიდეო და ფოტო მასალა. მაგალითად, კრწანისის ოლქში. ამ ყველაფერზე პერსონალურ მონაცემთა ინსპექტორს უნდა ჰქონდეს რეაგირება, რადგან საქმე გვაქვს პერსონალური ინფორმაციის გავრცელებასთან, ხოლო ცესკო-მ უნდა გადააყენოს ყველა იმ საოლქო საარჩევნო კომისიის წევრები, ვინც ამ მაქინაციას და კანონდარღვევას ჩადის. ყველა ამ ტიპის დოკუმენტზე ლუქის გახსნაც კი უკვე სისხლის სამართლის დანაშაულია და პროკურატურამ უნდა აღძრას საქმე. რისთვის სჭირდებათ ამ სამაგიდო სიების გახსნა?! უნდათ დაადგინონ ადამიანები, ვინც არ იყო მისული არჩევნებზე, რომ მათი ხმებით მოახდინონ მანიპულირება“, - განაცხადა ვაშაძემ.
მისივე თქმით, „ქართული ოცნება“ ამ არჩევნების შემდეგ გაუქმდება.
„მივმართავთ „ქართული ოცნების“ შტაბს და ცენტრალურ საარჩევნო კომისიას - არაფერი არ გამოგივათ ხალხნო, ხომ ხედავთ, რომ ყველაფერს ვიგებთ, მათ შორის თქვენი შტაბიდან გვაწვდიან ინფორმაციას. მინდა მივმართო სუს-სს, აუცილებლად გაუქმდებით ამ არჩევნების შემდეგ, რადგან თქვენ ხართ პოლიტიკური პოლიცია“, - აღნიშნა გიორგი ვაშაძემ.
