დარწმუნებული ვარ, საქართველოში აღარ იქნება ისეთი ხელისუფლება, რომელმაც შეიძლება, 7 ნოემბერი გაიმეოროს, – ამის შესახებ პარლამენტის პირველმა ვიცე-სპიკერმა თამარ ჩუგოშვილმა განაცხადა.
მისი თქმით, ქვეყანა არ უნდა დაბრუნდეს იქ, სადაც 7 ნოემბერს იყო. მისივე შეფასებით, შეცდომა ძალიან რბილი სიტყვაა იმის შესაფასებლად, რაც 7 ნოემბერს რეალურად მოხდა.
„ეს იყო სახელმწიფოს მხრიდან საზოგადოების წინააღმდეგ ჩადენილი უმძიმესი დანაშაული, ყველა ფუნდამენტური უფლების სრული გადათელვით, რომელიც შეიძლება, ადამიანს ჰქონდეს: გამოხატვის თავისუფლება, შეკრებისა და მანიფესტაციის თავისუფლება, ფიზიკური უსაფრთხოების დაცვა. ჩვენ ვნახეთ ძალიან მძიმე მოვლენები მთელი დღის განმავლობაში, დაწყებული დარბევით, გაგრძელებელი ტელეკომპანია იმედში სპეცრაზმის შევარდნით“, – განაცხადა ჩუგოშვილმა, რომელმაც აქვე აღნიშნა, რომ ეს იყო ძალიან მძიმე დანაშაულები, რომლებზეც პასუხისგება აუცილებელია.
