„ჰრინევსკის ცხოვრება, შემოქმედება და მისი ტრაგიკული აღსასრული ჩვენ კიდევ ერთხელ შეგვახსენებს, რომ ქართველმა და პოლონელმა ხალხებმა, ლიდერებმა ყველაფერი უნდა გააკეთონ, რომ ჩვენმა ხალხებმა აღარასოდეს გამოსცადონ ის, რაც ჩვენ ამ ორი საუკუნის განმავლობაში გამოვცადეთ”,- ამის შესახებ საქართველოს პარლამენტის თავმჯდომარემ ეროვნულ ბიბლიოთეკაში, პოლონელი მხატვრის, ჰენრიხ ჰრინევსკის სახელობის ხელოვნებისა და პოლონური ლიტერატურის დარბაზის გახსნაზე განაცხადა.
ირაკლი კობახიძემ პოლონურ მხარეს ფრესკების აღდგენაში გაწეული დახმარებისთვის მადლობა გადაუხადა. მისი თქმით, ჰენრიხ ჰრინევსკის სახელი უკვდავყოფას იმსახურებს.
“ამ დარბაზის გახსნა ემსახურება საქართველოში დაბადებული პოლონელის სახელის უკვდავყოფას. ჰრინევსკიმ ძალიან დიდი ამაგი დასდო ჩვენს ქვეყანას და მისი სახელი ნამდვილად იმსახურებს უკვდავყოფას. ეს საამაყო შვილი პოლონელი ხალხის თავის თავში მოიცავს ბევრ საუკეთესო თვისებას, რომელიც არის დამახასიათებელი ასევე ჩვენი მეგობრობისთვის და ჩვენი ურთიერთობებისთვის. მისი ცხოვრება არის, ასევე, ილუსტრაცია იმ დრამატული ბედისა, რომელიც გაიზიარეს ჩვენმა ხალხებმა ამ ორი საუკუნის განმავლობაში”,- განაცხადა პარლამენტის თავმჯდომარემ.
ირაკლი კობახიძის თქმით, ჰენრიხ ჰრინევსკის შემოქმედებამ, რომელიც პოლონური, ქართული და დასავლეთევროპული კულტურის ერთგვარი ნაზავია, საქართველოში დასავლური კულტურის განვითარებას შეუწყო ხელი. მისივე განცხადებით, სიმბოლურია, რომ დარბაზის გახსნა ორმხრივი ურთიერთობების ინტენსიურ ფაზას დაემთხვა.
“ჰენრიხ ჰრინევსკის შემოქმედება არის პოლონური, ქართული და დასავლეთ-ევროპული კულტურის ერთგვარი ნაზავი. ჰენრიხ ჰრინევსკის შემოქმედებამ ხელი შეუწყო საქართველოში დასავლური კულტურის განვითარებას. ჰრინევსკიმ და მისმა შემოქმედებამ ხელი შეუწყო, რა თქმა უნდა, ქართველებსა და პოლონელებს შორის მეგობრობის კიდევ უფრო გაღრმავებას. სიმბოლურია, რომ ამ დარბაზის გახსნა და ჰრინევსკის სახელის უკვდავყოფა დაემთხვა ძალიან ინტენსიურ ფაზას ჩვენი ურთიერთობებისა პოლონეთსა და საქართველოს შორის. ჩვენი ურთიერთობები ყოველდღიურად ღრმავდება. ვგულისხმობ ურთიერთობებს ხალხებს შორის, სახელმწიფოებს შორის და დღევანდელი დღეც ამის კიდევ ერთი დასტურია.
ჰრინევსკის ცხოვრება, შემოქმედება და მისი ტრაგიკული აღსასრული ჩვენ კიდევ ერთხელ შეგვახსენებს, რომ ქართველმა და პოლონელმა ხალხებმა, ლიდერებმა ყველაფერი უნდა გააკეთონ, რომ ჩვენმა ხალხებმა აღარასოდეს გამოსცადონ ის, რაც ჩვენ ამ ორი საუკუნის განმავლობაში გამოვცადეთ. თავისუფლება ჩვენი ხალხების უმთავრესი მონაპოვარია და ამ მონაპოვარს ჩვენ განსაკუთრებულად უნდა გავუფრთხილდეთ”,- განაცხადა სიტყვით გამოსვლისას საქართველოს პარლამენტის თავმჯდომარემ.
დამსწრეებს სიტყვით მიმართეს პოლონეთის რესპუბლიკის სეიმის მარშალმა მარეკ კუხჩინსკიმ, საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა, ეროვნული ბიბლიოთეკის გენერალურმა დირექტორმა, გიორგი კეკელიძემ, პოლონეთის საგარეო საქმეთა მინისტრმა, შიმონ შინკოვსკი ვილ სეკმა, პოლონეთის ელჩმა საქართველოში, მარიუშ მაშკიევიჩმა და უცხოეთში პოლონური კულტურული მემკვიდრეობის ეროვნული ინსტიტუტის, „პოლონიკას“ დირექტორმა, დოროტა იანიშევსკა-აიკუბიაკმა.
