ნებისმიერ არჩევნებში საზოგადოება გვიზიარებს თავის გზავნილს და ჩვენ რა თქმა უნდა, ყურად ვიღებთ ამ გზავნილს, – ამის შესახებ პარლამენტის თავმჯდომარე ირაკლი კობახიძემ „ქართული ოცნების“ თავმჯდომარის, ბიძინა ივანიშვილის დღევანდელ მიმართვასთან დაკავშირებით განაცხადა.
მისი თქმით, მათთვის უმთავრესი პრიორიტეტია საზოგადოების დაკვეთის შესაბამისი მოქმედება.
„ამ წლების მანძილზე ხელისუფლების საქმიანობასა და მოქმედებაში მთელი რიგი ხარვეზები იყო. ამის გარეშე არ არსებობს არც ერთი ხელისუფლების საქმიანობა. ჩვენთვის მთავარია, რომ ვიმუშაოთ მაქსიმალურად, რათა განვავითაროთ ქვეყანა და ვიმოქმედოთ იმის მიხედვით, თუ რა არის ჩვენი საზოგადოების მთავარი საწუხარი და რა არის მთავარი პრიორიტეტი ჩვენი საზოგადოების. ეს იყო მთავარი ბიძინა ივანიშვილის დღევანდელ გზავნილში”, – განაცხადა კობახიძემ.
