ვფიქრობ, ბიძინა ივანიშვილმა ძალიან სწორი აქცენტები გააკეთა და სწორად შეაფასა ის სიტუაცია, რაც ჩვენ გვაქვს, – ამის შესახებ პრემიერ-მინისტრმა მამუკა ბახტაძემ „ქართული ოცნების“ თავმჯდომარის, ბიძინა ივანიშვილის დღევანდელ მიმართვასთან დაკავშირებით განაცხადა.
მისი თქმით, საქართველოს მთავრობამ მიიღო კონკრეტული გზავნილები საზოგადოებისგან და ამ გზავნილებს სჭირდება კონკრეტული შედეგების დემონსტრირება.
„საზოგადოება სჭირდება სწრაფი შედეგები, საზოგადოება გვეუბნება, რომ საჭიროა ძირეული ცვლილებები. ჩვენ ამ ცვლილებებისთვის მზად ვართ. ჩვენ ეს გზავნილი გავიაზრეთ, ვიცით, რაც არის გასაკეთებელი, როგორ უნდა გავაკეთოთ და გავაკეთოთ რაც შეიძლება ოპერატიულად. ამასთან ერთად, ჩვენ კიდევ ერთხელ უნდა გავიაზროთ ის, თუ რა წინაპირობები უძღოდა გზავნილს, რაც ჩვენ მივიღეთ საზოგადოებისგან. ერთ-ერთი გახლავთ ის, რაც ჩვენ, სამწუხაროდ, ვერ შევძელით, რომ ჩამოგვეყალიბებინა სამართლიანობის განცდა საზოგადოებაში. ამ შემთხვევაში საზოგადოების გზავნილი არის ძალიან ობიექტური და ვფიქრობ, ამ მიმართულებით მნიშვნელოვანი ნაბიჯები უნდა გადავდგათ და ამას აუცილებლად გავაკეთებთ”, – განაცხადა მამუკა ბახტაძემ.
მისი თქმით, საჭიროა სოციალური პოლიტიკის დაკორექტირება და ამ მიმართულებით ნაბიჯების გადადგმა უკვე დაიწყო.
„გაცილებით მეტი ყურადღება და მეტი პროგრამა არის გასაკეთებელი სოციალურად დაუცველი ჯგუფებისთვის. აუცილებლად გვაქვს შესაქმნელი მეტი შესაძლებლობები ჩვენი პედაგოგებისთვის და ამავე დროს ჩვენი ახალგაზრდებისთვის. იცით, რომ სწორედ ახალგაზრდული პოლიტიკა არის ჩვენი მთავრობის მთავარი პრიორიტეტი. ჩვენ შეგვიძლია, ძალიან ბევრ ეკონომიკურ გამოწვევაზე ვისაუბროთ, მაგრამ ამავე დროს მინდა, ყველა დარწმუნდეს, რომ ჩვენ გვაქვს სრული მზაობა ვუპასუხოთ გამოწვევებს ადეკვატურად, ისე რომ უახლოეს პერიოდში საზოგადოებამ ეს ყველაფერი იგრძნოს”, – აღნიშნა ბახტაძემ.
