თბილისის მერის, კახა კალაძის განცხადებით, „ქართული ოცნება – დემოკრატიული საქართველოს“ მიერ დაშვებული ერთ-ერთი შეცდომა წინა ხელისუფლებასთან გამოცხადებული კოაბიტაცია იყო. ამის შესახებ კახა კალაძემ გადაცემა „იმედი LIVE“-ში განაცხადა.
„ჩვენ შეცდომები გვქონდა ამ 6 წლის განმავლობაში, მაგრამ არ ჩაგვიდენია დანაშაული. ეს არის ძალიან მნიშვნელოვანი და არის ის, რაც განასხვავებს ჩვენ ხელისუფლებას წინა ხელისუფლებისგან. "ნაციონალურმა მოძრაობამ" შეძლო და მოახერხა, თავისი პროპაგანდისტული მანქანის მეშვეობით, რომ ჩვენ არ გვაქვს უფლება ვისაუბროთ 9 წელზე. ჩვენ არ გვაქვს უფლება ვისაუბროთ წარსულზე, ძალიან მარტივია, ჩვენ 80% უნდა დავუთმოთ, იმაზე რას ვაკეთებთ ქვეყანაში და ასევე ვისაუბროთ, როგორი ქვეყანა გვინდა, საით მივდივართ, როგორი ქვეყანა გვინდა ხვალ. მაგრამ, ამავდროულად, უნდა გავაკეთოთ შედარება რა იყო, რა ცვლილებები განვახორციელეთ, რო დაინახოს განსხვავება მოსახლეობამ, თორემ, სხვანაირად შეუძლებელია.
ჩვენ დავუშვით შეცდომები, დეტალებში არ შევალ და ერთ-ერთს დავასახელებ, რომელიც საკმაოდ მტკივნეულია მოსახლეობისთვის. ეს არის ე.წ კოჰაბიტაცია. 2012 წლის შემდეგ, რომელზეც შეგვიძლია ვთქვათ, ერთის მხრივ, დემოკრატიული პროცესების გაჯანსაღებისთვის ეს ნორმალურ ქვეყანაში სწორი ნაბიჯია და ასეც უნდა ყოფილიყო. მაგრამ, ეს ე.წ კოჰაბიტაცია 6 წლის თავზე ჩვენს წინააღმდეგ იქნა გამოყენებული“, - განაცხადა კალაძემ.
