თუ ბიძინა ივანიშვილი პრეზიდენტის პოსტს ჩაიგდებს ხელში, ერთ წამში დააბრუნებს კანაფის კულტივაციის შესახებ კანონპროექტს პარლამენტში, - ამის შესახებ გაერთიანებული ოპოზიციის პრეზიდენტობის კანდიდატმა გრიგოლ ვაშაძემ განაცხადა.
როგორც დღეს გამართულ პრესკონფერენციაზე ვაშაძემ აღნიშნა, საპრეზიდენტო არჩევნების პირველ ტურში საქართველოს მოქალაქების, მთლიანად ქართული საზოგადოების, გაერთიანებული ოპოზიციის და ეკლესიის პოზიციამ ნაყოფი გამოიღო.
„მილიონმა ამომრჩეველმა უარი უთხრა ივანიშვილს და ე.წ. ქართულ ოცნებას, მილიონმა ამომრჩეველმა აიძულა ის, რომ უარი ეთქვა კანაფის წარმოებასა და ქვეყნის ნარკოპლანტაციად გადაქცევაზე. დღეს ხელისუფლებამ ვერ გაუძლო საქართველოს მოქალაქეების წნეხს, რომელმაც კიდევ ერთხელ აჩვენა ძალა. ამავდროულად უნდა გვახსოვდეს, რომ ივანიშვილმა თავად აღიარა, რომ მისი იდეა იყო მარიხუანას წარმოება, რომ ის პირადად არის ამაში დაინტერესებული. თუ მან პრეზიდენტის პოსტიც ჩაიგდო ხელში, აუცილებლად შემოიტანს უკან კვლავ კანაფის კულტივაციის შესახებ კანონპროექტს. ის არ იტყვის უარს, როგორც თვითონ თქვა, 500- პროცენტიან მოგებაზე. სწორედ მეორე ტურში გამარჯვების შემდეგ დაიწყება ქვეყანაში არსებული პრობლემების გადაწყვეტა. მიუხედავად პოლიტიკური შეხედულებებისა და მიუხედავად იდეოლოგიური განსხვავებებისა, პოლიტიკურმა პარტიებმა მიაღწიეს იმას, რომ ყალიბდება კონსენსუსი იმ გზაზე, რომელიც ჩვენ ქვეყანას გამოიყვანს „ქართული ოცნების“ მიერ გამოწვეული კრიზისიდან", - განაცხადა გრიგოლ ვაშაძემ.
ცნობისთვის, კანაფის კულტივაციის შესახებ საკანონმდებლო პაკეტს პარლამენტიდან გაიწვევენ.
