ლევან ბერძენიშვილის ჯაშუშობასთან დაკავშირებული სამწუხარო ინციდენტი ამოწურულია, – ამის შესახებ გაერთიანებული ოპოზიციის პრეზიდენტობის კანდიდატმა გრიგოლ ვაშაძემ ჟურნალისტებს „ნაციონალური მოძრაობის“ ხელისუფლების მიერ ლევან ბერძენიშვილის ჯაშუშობაში დადანაშაულებასთან დაკავშირებით განუცხადა.
მისი თქმით, დღეს არის მხარდაჭერის, გაერთიანების დრო.
„2007 წელს მე ვიყავი რიგითი მოქალაქე და ვერანაირ მონაწილეობას ამ ინციდენტში ვერ მივიღებდი. მეორეც, მე პარტიის წევრი არ ვყოფილვარ 2017 წლის 21 იანვრამდე. მესამეც, მე არასდროს არ ვთვლიდი ბატონ ლევან ბერძენიშვილს არავის ჯაშუშად და ვთვლიდი ადამიანად, რომელსაც უზარმაზარი წვლილი აქვს შეტანილი ეროვნულ მოძრაობაში, რომლის უშუალო მონაწილეობით ჩვენ მივაღწიეთ ჩვენი დამოუკიდებლობის აღდგენას, რაც მას ვუთხარი პირადად, ჯერ პირად შეხვედრაზე, მერე პირადად დავადასტურე.
ეს სამწუხარო ინციდენტი ამოწურულია. დღეს არის მხარდაჭერის, გაერთიანების დრო და კიდევ ერთხელ ვიმეორებ, იმისთვის რომ მოხდეს იმ მახინჯი სისტემის დემონტაჟი, რომელიც ბადებს ერთპიროვნულ ან ერთპარტიულ მმართველობას და „რესპუბლიკური პარტიის“ მხარდაჭერა არის ძალიან მნიშვნელოვანი. ოთხ ნოემბერს, ქუთაისში მექნება გამოსვლა, სადაც ჩვენ ვილაპარაკებთ იმ რეფორმებზე, რომელიც სასწრაფოდ არის გასატარებელი და რომლის დიდი ნაწილი „რესპუბლიკურ პარტიასთან“ უკვე შეთანხმებულია. არის დიდი ნაწილი, რომელზეც „რესპუბლიკური პარტიის“ ექსპერტიზა გვჭირდება და ამ საკითხების განხილვა ჯერ არ დაგვიმთავრებია. მაგრამ ძალიან ბევრი საკითხი უკვე შეთანხმებული გვაქვს სხვა პარტიებთან და ორშაბათს, დიდი ალბათობით, დამატებით ინფორმაციას მიიღებთ“, – განაცხადა გრიგოლ ვაშაძემ.
ცნობისთვის, „რესპუბლიკური პარტია“ არჩევნების მეორე ტურში გრიგოლ ვაშაძეს უჭერს მხარს.
