„ქართული ოცნების“ ერთ-ერთი ლიდერის, მამუკა მდინარაძის ინფორმაციით, პარტიაში საკადრო ცვლილებები იგეგმება.
მისი განმარტებით, საუბარია გადახალისებაზე და პარტიაში ახალი წევრების შეყვანაზე.
„მათ შორის, სამთავრობო დონეზე უდიდესი გამოწვევების წინაშე დგას ეკონომიკური გუნდი იმიტომ, რომ მთავარი პრობლემა, რომელიც აწუხებს მოსახლეობას, ეს არის სოციალური მდგომარეობა. ადამიანებს ამ მიმართულებით მეტი დინამიკა, მეტი ტემპი სჭირდებათ. „ქართული ოცნების“ მთავარი გამოწვევა არის მოქალაქეებთან კოორდინაცია სწრაფად და მეტად განახორციელოს. ასევე, გარკვეული საკითხები დაკავშირებულია მენეჯმენტთან, მათ შორის კომუნიკაციის კუთხით. ძალიან ხშირად გვსაყვედურობენ, რომ რასაც ვაკეთებთ, ისიც არ მიდის საზოგადოებამდე. მინისტრების ცვლილებაზე საუბარი არ არის. ჩვენ გვყავს ახალი მთავრობა, რომელსაც კარგი ბექრაუნდი აქვს და იმედი გვაქვს, ეკონომიკური გუნდი შეძლებს იმ გამოწვევებზე ადეკვატურ პასუხს, რომელიც მოსახლეობამ ამ არჩევნებზე გამოგვიგზავნა“, - განაცხადა მდინარაძემ.
მისივე ინფორმაციით, გუშინ და დღეს საკონსულტაციო შეხვედრები გაიმართა, რომელშიც ბიძინა ივანიშვილი მონაწილეობდა.
„ბატონი ბიძინა ხშირად ესწრება შეხვედრებს, მათ შორის შტაბთან შეხვედრებსაც. დღის განმავლობაში შეხვედრას ბიძინა ივანიშვილი ესწრებოდა, სალომე ზურაბიშვილი ამ შეხვედრებში არ მონაწილეობდა. ბევრი რამ არის შტაბში გადასალაგებელი, მათ შორის პარტიულ მუშაობასთან დაკავშირებით. არ გამოვრიცხავთ ახალი სახეების შემოსვლას. ბუნებრივია, კიდევ უფრო გააძლიერებს პატია თავის მუშაობას და შედეგებიც იქნება ადეკვატური“, - აღნიშნა მდინარაძემ.
