ის, რომ ზაზა სარალიძე ადგილს უნახავს „ნაციონალურ მოძრაობას“, ეს ხომ ყველამ ვიცით, - ამის შესახებ "ქართული ოცნების" თავმჯდომარე ბიძინა ივანიშვილმა ჟურნალისტებთან შეხვედრაზე განაცხადა.
მისი თქმით, ის ვერ ხედავს, რომ ხელისუფლება მოიქცა არაადეკვატურად.
„ძალიან ვწუხვართ იმ ტრაგედიის გამო, რომელიც მოხდა, მაგრამ ბატონ ზაზას ვთხოვდი, კეთილი ინებოს, ასე არ შეიძლება პოლიტიზირება. ის, რომ ადგილს უნახავს „ნაციონალურ მოძრაობას“, ეს ხომ ყველამ ვიცით. ის კარავი რისთვის დგას ხომ ვიცით. ხელისუფლებამ ყველაფერი გააკეთა ამ საქმეზე, მთავარი პროკურორი გადადგა, თუმცა ამის აუცილებლობა საერთოდ არ იყო. მე ვთხოვდი ბატონ ზაზას, რომ ხელს ნუ შეუშლის სასამართლოს, არ არის ეს ნორმალური, არ იმსახურებს დღევანდელი ხელისუფლება ამას, რაც ხდება. არ არის საჭირო ქუჩა. დაველოდოთ ჯერ კიდევ ყველაფერს, ყველა კითხვას გაეცემა პასუხი“, - განაცხადა ბიძინა ივანიშვილმა.
ბიძინა ივანიშვილმა, როგორც წინა ინტერვიუზე, ახლაც თქვა, რომ გირგვლიანისა და ამ ტრაგედიის შედარება უზნეობაა.
„ამ საქმეს ადარებენ გირგვლიანს, არ არის ეს უზნეობა? იქ გირგვლიანი ხელისუფლებამ მოკლა. მე კიდევ ერთხელ ვუთანაგრძნობ ბატონ ზაზას, მაგრამ ასე არ შეიძლება. განა კარგად არ ვიცით, რომ ეს პოლიტიზირებულია „ნაციონალებისგან“? შეიძლება შვილის მკვლელობა ასე პოლიტიკაში გადავიტანოთ? რად უნდა იქ კარავი რომ ააგო. სამდღიანი მიტინგი ჰქონდათ დაგეგმილი, მაგრამ გადადეს. კარგად იმუშავეს სამართალდამცველებმა. ზაზა სარალიძე უნდა ყოფილიყო მთავარი იქ. რატომ დაგეგმეს სამდღიანი მიტინგი, ტყუილად? სამართალდამცველებმა მოახერხეს იქ რაღაც პრევენცია გაუკეთეს და გადაიდო პროცესი. სად ჩანს ხიფათი არ მესმის“, - დასძინა ივანიშვილმა.
