სიახლე არ არის, რომ სააკაშვილი და „ნაციონალური მოძრაობა“ არიან უცხო სხეული და მეტასტაზი ჩვენი ქვეყნისთვის, – ამის შესახებ თბილისის მერმა კახა კალაძემ ერთ-ერთ უკრაინულ ვებგვერდზე გამოქვეყნებულ ფარულ აუდიოჩანაწერთან დაკავშირებით განაცხადა.
მისი თქმით, საქართველომ და ქართველმა ხალხმა 2012 წელს მათ მიუჩინა თავისი ადგილი.
„მოვისმინე ეს ჩანაწერი და მინდა გითხრათ, მგონი, სიახლე არ არის, რომ სააკაშვილი და „ნაციონალური მოძრაობა“ არიან უცხო სხეული და მეტასტაზი ჩვენი ქვეყნისთვის, ქართველებისთვის. საქართველომ და ქართველმა ხალხმა 2012 წელს მათ მიუჩინა თავისი ადგილი. ეს არის პოლიტიკურ ნაგავსაყრელზე გასტუმრება. 28 ოქტომბერს ქართველი ხალხი „ნაციონალურ მოძრაობასა“ და მიხეილ სააკაშვილს გასცემს საკადრის პასუხს“, – განაცხადა კახა კალაძემ.
ცნობისთვის, ერთ-ერთ უკრაინულ ვებგვერდზე საქართველოს ყოფილი პრეზიდენტის, მიხეილ სააკაშვილისა და მისი ბიძის, თემურ ალასანიას ფარული ჩანაწერი აიტვირთა, რომელშიც თითქოს, თემურ ალასანია მიხეილ სააკაშვილთან ბიძინა ივანიშვილის ლიკვიდაციაზე საუბრობს.
