პრაქტიკულად საარჩევნო კამპანია სრულდება, არჩევნები არის რამდენიმე დღეში და ვფიქრობ, საზოგადოებას აქვს საკმარისი ინფორმაცია, რათა გააკეთოს სწორი არჩევანი მშვიდ მომავალსა და უკან დაბრუნებას შორის, გააკეთოს არჩევანი ღირსებასა და იმ სიბინძურეს შორის, რაც ამ სამი-ოთხი კვირის განმავლობაში ვნახეთ, - ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
„ეს საარჩევნო დემოკრატია სწორედ ჩვენი ხელისუფლების პირობებში გახდა შესაძლებელი და ჩვენ გადავდგით ნაბიჯი, რომელიც საქართველოს პოლიტიკურ სისტემას მოუტანს კიდევ უფრო მეტ წინსვლას, კიდევ უფრო დაახლოებს უბრალო ადამიანებთან, რომლებმაც უნდა ისარგებლონ ამ დემოკრატიით“, – განაცხადა თალაკვაძემ.
მისი თქმით, სალომე ზურაბიშვილმა კიდევ ერთხელ გულწრფელად აჩვენა საზოგადოებას, რომ ის არის სამშობლოს პატრიოტი და არის სწორედ ის ადამიანი, რომელიც საზოგადოების გაერთიანებას შეძლებს მომავალში იმ მნიშვნელოვანი საკითხების გარშემო, როგორიც არის ჩვენი ქვეყნის ტერიტორიული მთლიანობის აღდგენა.
„ჩემი აზრით, ძალიან მნიშვნელოვანი დღე იყო. დღეს გამოჩნდა, როგორი ძალა აქვს ერთიანობას, რა მნიშვნელოვანია ჩვენი ქვეყნისთვის, რომ თითოეული ადამიანი, ვინც საქართველოს პროგრესისა და უკეთესი ცვლილებების გულშემატკივარია, ერთად დავდგეთ. ვფიქრობ, პრეზიდენტობის კანდიდატმა სალომე ზურაბიშვილმა კიდევ ერთხელ გულწრფელად აჩვენა საზოგადოებას, რომ ის არის სამშობლოს პატრიოტი, მას აქვს მომავლის ხედვა და არის სწორედ ის ადამიანი, რომელიც საზოგადოების გაერთიანებას შეძლებს მომავალში იმ მნიშვნელოვანი საკითხების გარშემო, როგორიც არის ჩვენი ქვეყნის ტერიტორიული მთლიანობის აღდგენა, საქართველოს გაწევრიანება ევროკავშირში, ადამიანის უფლებების დაცვა და როგორიც არის ჩვენი პოტენციალის კიდევ უფრო ეფექტურად გამოყენება განვითარებისთვის“, – განაცხადა არჩილ თალაკვაძემ.
