ჩვენი ამოცანაა, არასდროს ავყვეთ რუსეთს თამაშში, თითქოს ნატო-ში გაწევრიანება რაიმე კავშირშია ტერიტორიული მთლიანობის დათმობასთან , - ამის შესახებ „ევროპული საქართველოს“ პრეზიდენტობის კანდიდატმა, დავით ბაქრაძემ პირველი არხის გადაცემა „დებატები 2018“-ში The Heritage Foundation-ის მკვლევარის, ლუკ კოფის სტატიაზე საუბრისას, კითხვაზე - რამდენად შესაძლებელია ნატო-ში ინტეგრაცია ქვეყნისთვის საინტერესო იყოს ნატო-ს მე-5 პუნქტის ამოქმედების გარეშე.
ბაქრაძის თქმით, მისთვის და მისი პოლიტიკური ძალისთვის არ არსებობს არანაირი კითხვის ნიშანი, რომ საქართველოს მომავალი გადის ევროკავშირსა და ნატო-ზე.საქართველოს სიმშვიდისა და კეთილდღეობის რეცეპტი არის სწორედ ის, რაც გააკეთა აღმოსავლეთ ევროპამ, ბალტიისპირეთმა.
„რაც შეეხება, რა სქემით მოხდება ნატო-ში ჩვენი მომავალი გაწევრიანება, ჩვენი ამოცანაა, არასდროს ავყვეთ რუსეთს იმ თამაშში, რომელსაც თავს გვახვევს, თითქოს ნატო-ში გაწევრიანება რაიმე კავშირშია ტერიტორიული მთლიანობის დათმობასთან. არანაირი დათმობა არ მოხდება. საქართველოს სიმშვიდისა და კეთილდღეობის რეცეპტი არის სწორედ ის, რაც გააკეთა აღმოსავლეთ ევროპამ, ბალტიისპირეთმა. რაც უფრო სწრაფად შევალთ ევროკავშირსა და ნატო-ში, მით უფრო მეტად იძულებული იქნება რუსეთი, აღიაროს, რომ საქართველო არის მეზობელი და არა ტერიტორია, რომელიც უნდა აკონტროლოს. რუსეთთან ნორმალიზაციის, ჩვენი უსაფრთხოების, ინვესტიციებისა და კეთილდღეობის გზაც გადის სწორედ საქართველოს ევროკავშირსა და ნატო-ში გაწევრიანებაზე. როგორც პრეზიდენტი, ყველაფერს გავაკეთებ, რომ ეს მოხდეს რაც შეიძლება სწრაფად“, – განაცხადა დავით ბაქრაძემ.
