ეს არის ის საქციელი, რომელსაც მაგალითად სჩადის რუსეთის მთავრობის წევრი უცხოეთში, როდესაც მას აკრიტიკებენ სახელისუფლებო კორუფციაზე, - ამის შესახებ „ევროპული საქართველოს“ პრეზიდენტობის კანდიდატმა დავით ბაქრაძემ კოპენჰაგენში იუსტიციის მინისტრის, თეა წულუკიანის განცხადებასთან დაკავშირებით აღნიშნა.
მისი თქმით, დღევანდელი ხელისუფლება მივიდა იქამდე, რომ მას აღარ აქვს პასუხები საზოგადოების კითხვებზე, რომ მას აღარ აქვს არგუმენტები საერთაშორისო კრიტიკის მოსაგერიებლად და მივიდა იქამდე, რომ დაუპირისპირდა არსამთავრობო სექტორს, სამოქალაქო საზოგადოებას, მთლიან ოპოზიციურ სპექტრს, დაუპირისპირდა მედიას და ჟურნალისტებს.
„ეს ყველაფერი ნიშნავს მხოლოდ ერთს, ამ ხელისუფლებამ საკუთარი რესურსი ამოწურა და 28 ოქტომბრის არჩევნები უნდა გამოვიყენოთ სწორედ იმისთვის, რომ წერტილი დავუსვათ ხელისუფლებას და მასთან ერთად კორუფციას, მასთან ერთად უიმედობას და ჭაობს, რომელშიც დღეს ვართ და ქვეყანა მშვიდობიანად ყოველგვარი დაპირისპირების რევანშის გარეშე წავიყვანოთ წინ“, - განაცხადა დავით ბაქრაძემ.
ცნობისთვის, იუსტიციის მინისტრმა თეა წულუკიანმა არასამთავრობო ორგანიზაცია "საერთაშორისო გამჭირვალობა-საქართველო" კოპენჰაგენის საერთშორისო ანტიკორუფციულ კონფერენციაზე გააკრიტიკა და თქვა, რომ შესაძლოა, ორგანიზაციის ხელმძღვანელს, ეკა გიგაურს წვლილი მიუძღოდა 7 ნოემბრის აქციის დაშლაში. თეა წულუკიანმა ეს განცხადება მას შემდეგ გააკეთა, რაც პანელზე სიტყვით გამოსვლის დროს მას "საერთაშორისო გამჭვირვალობა-საქართველოს" აღმასრულებელი დირექტორის მოადგილე გიორგი ონიანმა საქართველოში არსებული ელიტური კორუფციის შესახებ კითხვა დაუსვა.
