"ქართული ოცნების" მხარდაჭერილი კანდიდატის, სალომე ზურაბიშვილის განცხადებით, გაერთიანებული ოპოზიციის "ძალა ერთობაშია" საპრეზიდენტო კანდიდატის, გრიგოლ ვაშაძის კითხვებს ხვალ უპასუხებს.
მისი თქმით, ახლა მას არ უპასუხებს.
„არაფერს არ ვუპასუხებ ბატონ ვაშაძეს, რომელმაც მომმართა არაერთხელ და სულ სხვადასხვა ტონალობაში. ამიტომ, არანაირად არ ვთვლი ვალდებულად თავს, რომ ბატონ ვაშაძეს გავცე რამე პასუხი.
ამ საკითხებზე მქონდა პასუხები, მაგრამ ხვალ თუ დამისვამს კითხვას, იქ პასუხს გავცემ“, – განაცხადა ზურაბიშვილმა.
ცნობისთვის, გაერთიანებული ოპოზიციის "ძალა ერთობაშია" საპრეზიდენტო კანდიდატი "ქართული ოცნების" მხარდაჭერილი კანდიდატისგან კითხვებზე პასუხებს ითხოვს. გრიგოლ ვაშაძემ ის კითხვები დაასახელა, რომლებზეც სალომე ზურაბიშვილის პასუხები აინტერესებს.
შეგახსენებთ, სალომე ზურაბიშვილის, გრიგოლ ვაშაძისა და დავით ბაქრაძის დებატები საზოგადოებრივ მაუწყებელზე 24 ოქტომბერს 22:00 საათზე იგეგმება.
