"რუსთავი 2"-ის მიერ გავრცელებულ ჩანაწერებთან დაკავშირებით მირზა სუბელიანი სახალხო დამცველთან თანამშრომლობაზე უარს აცხადებს.
ნინო ლომჯარიას განცხადებით, მირზა სუბელიანს მასთან მხოლოდ ერთი თხოვნა ჰქონდა, რომ ხორავას ქუჩაზე მომხდარი მკვლელობის საქმეზე მისი შვილის უფლებები დაცული ყოფილიყო.
„მირზა სუბელიანი თვლის, რომ მისი შვილის უფლებები იყო დარღვეული და სახალხო დამცველთან თხოვნა ჰქონდა, რომ შვილის უფლებები ამ პროცესში ყოფილიყო დაცული“, – განაცხადა ნინო ლომჯარიამ.
სახალხო დამცველის თქმით, სუბელიანი აცხადებს, რომ საკანში თავს უსაფრთხოდ გრძნობს.
მან აქვე აღნიშნა, რომ პატიმრის უფლებები დარღვეულია ჩანაწერებთან დაკავშირებით და გამოძიება აუცილებლად უნდა დაიწყოს.
„კონკრეტულ ფაქტთან დაკავშირებით სად, როგორ მოხდა, ამაზე არ უსაუბრია. ჩვენი ინტერესის საგანი იყო, გვენახა, რამდენად იყო დაცული მისი უსაფრთხოება, რაზეც განგვიცხადა, რომ საფრთხეს არ გრძნობს. საკანში სათვალთვალო კამერის დაკვირვების ქვეშ იმყოფება. ყველა კითხვა, რაც ეხებოდა გავრცელებულ ჩანაწერებს, უპასუხოდ დატოვა. ვთვლი, რომ გავრცელებულ ჩანაწერებში ისმის დანაშაულის ნიშნის შემცველი ფაქტების შესახებ ინფორმაცია, ამიტომ ჩანაწერებთან დაკავშირებით აუცილებლად უნდა დაიწყოს გამოძიება, განსაკუთრებით მაშინ, როდესაც საქმე ეხება წამებას, არასრულწლოვნების ცემის ფაქტს, რაზეც თავად სუბელიანი საუბრობს, რომ აუცილებლად უნდა მოხდეს მისი გამოკითხვა და გამოძიების დაწყება. ძალიან სერიოზულ დანაშაულებზე საუბრობს, მათ შორის, როგორც ჩანს, თავადაც არის მონაწილე. თუმცა ჩვენ ვერ ვისაუბრებთ მტკიცებით ფორმატში, რადგან ამ ყველაფერს ნამდვილად სჭირდება გამოძიება. დაირღვა პატიმრის უფლებები, ამასთანავე, შინაარსთან დაკავშირებითაც აუცილებლად უნდა დაიწყოს გამოძიება“, – დასძინა ნინო ლომჯარიამ.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.
მირზა სუბელიანთან ციხეში ვიზი დაადასტურა ვიქტორ ჯაფარიძემ.
