ჰუმანიტარული სიტუაცია აფხაზეთსა და სამხრეთ ოსეთში ძალიან კატასტროფულია, საქართველოს პრემიერ-მინისტრმა მითხრა, – ამის შესახებ გერმანიის კანცლერმა ანგელა მერკელმა სტუდენტებთან შეხვედრაზე, თსუ-ში განაცხადა.
სტუდენტის კითხვაზე, როგორ შეაფასებდა პროცესებს, რომელიც ცხინვალის რეგიონსა და აფხაზეთში მიმდინარეობს და თუ თვლის, რომ აღნიშნული რეგიონები ოკუპირებულია რუსეთის მიერ, ანგელამ განაცხადა, რომ ეს არის უსამართლობა.
„მე პრემიერ-მინისტრმა მითხრა, რომ ჰუმანიტარული სიტუაცია ამ რეგიონებში ძალიან კატასტროფულია, ბევრი ადამიანი ტოვებს თავის სამშობლოს, მოსახლეობის რაოდენობა იკლებს, ადამიანები, რომლებსაც სამშობლო ჰქონდათ, აღარ ცხოვრობენ იქ. საქართველო მუშაობს ამ მიმართულებით და გერმანიას შეუძლია დაეხმაროს. რაც იქ ხდება, ეს არის მიუღებელი სიტუაცია“, – განაცხადა ანგელმა მერკელმა.
მისი თქმით, საქართველოს რუსეთის ფაქტორის გამო, ძალიან ცუდად მოუწია განვითარება, რუსეთის ფაქტორი ძალიან დიდი იყო.
„მე პირადად ბევრს დროს ვუთმობ სხვადასხვა კონფლიქტის მოგვარებაზე ფიქრს, მაგალითად, უკრაინისა და საქართველოს კონფლიქტებზე. საქართველოს რუსეთის ფაქტორის გამო, ძალიან ცუდად მოუწია განვითარება. რუსეთის ფაქტორი ძალიან დიდი იყო. გამოცდილება გვაჩვენებს, რომ არ უნდა შევეგუოთ. ეს არ არის ერთდღიანი პროცესი, რომელსაც ერთ დღეში გადავწყვეტთ. ეს არის გრძელვადიანი პროცესი. სამწუხაროდ, ისეთი სიტუაცია გვაქვს, რომ ამ რეგიონებში ადამიანებს ძალიან ცუდად აქვთ საქმე“, – აღნიშნა მერკელმა.
როგორც მან აღნიშნა, აუცილებელია ჰუმანიტარული დახმარება და გერმანიას აქვს ჰუმანიტარული მისია, რომელიც ცდილობს, ამ კონფლიქტის მოგვარებაში საკუთარი წვლილი შეიტანოს.
„პირველ რიგში, უნდა დავეხმაროთ ჰუმანიტარულად. ჩვენ გვაქვს ჰუმანიტარული მისია, რომელიც ცდილობს თავისი წვლილი შეიტანოს ამ კონფლიქტის მოგვარებაში. როდესაც ადამიანს სამედიცინო დახმარება, განათლება სჭირდება, აუცილებელია, მას ჰქონდეს შესაძლებლობა გადმოლახოს საზღვარი, როდესაც მათ აღნიშნული შესაძლებლობა უმცირდებათ, ეს არის ძალიან ცუდი სიგნალი“, – დასძინა მერკელმა.
