ყვარლის რაიონის სოფელ თივიდან ლეკები საცხოვრებლად დაღესტანში გადადიან. სოფლის დატოვების მიზეზად, ადგილობრივები გაუსაძლის საცოვრებელ პირობებს ასახელებენ. კახეთის საინფორმაციო ცენტრის ინფორმაციით, სოფელში არ არის სასმელი წყალი, ბუნებრივი აირი, საბავშვო ბაღი. სასმელ წყალს სოფლიდან 2 კილომეტრიდან დაშორებული ადგილიდან ეზიდებიან.
"ყველაზე მეტად სასმელი წყალი გვიჭირს. 2 კილომეტრიდან ხელით ვეზიდებით. როგორც ვიცით, სოფლის დახმარების პროგრამით 15 ათას ლარზე მეტი იყო გამოყოფილი. ამ ფულით სასმელი წყალი უნდა გაეყვანათ. ფული გაიხარჯაო გვითხრეს და წყალი მაინც არ გვაქვს. სათავე ნაგებობა დაბინძურებული იყო. წყალი ისე გაუშვეს, არ გაასუფთავეს. ჭუჭყი მილებში გაიჭედა და აღარ ვარგა", - ამბობს ფატიმა ალხაზოვა.
ავარიულ მდგომარეობაშია საჯარო სკოლის შენობაც. რაც შეეხება სოფლის ამბულატორიას, შენობა უკვე დაინგრა და ამბულატორია დროებით კერძო სახლში განათავსეს. „ექიმი ხუთშაბათს მოდის 2 საათით. ამბულატორიაში მარტო მაგიდა და სკამები დგას. წნევას გაგვიზომავს, წამალს გამოგვიწერს და სულ ეგ არის", - გვითხრა დაძილო მაგამედოვმა.
როგორც ადგილობრივებმა აღნიშნეს, ბოლო პერიოდში ლეკები სოფელს ტოვებენ და საცხოვრებლად დაღესტანში გადადიან. „ძირითადად მხოლოდ მოხუცები და ასაკიანი ხალხი დავრჩით. 5 შვილი მყავს და ყველა დაღესტანში ცხოვრობს. აქ ცხოვრება არ უნდათ, რადგან არაფერი არ არის. ზამთარში მეც იქ მივდივარ ხოლმე", - აღნიშნა 73 წლის ევა ალიმოვამ.
საქართველოს მთავრობამ თივის ერთ-ერთ უბანში ცოტა ხნის წინ აჭარელი ეკომიგრანტები ჩაასახლა.
თივი ყვარლის რაიონის სოფელია. მოსახლეობის 2002 წლის აღწერის მონაცემებით, სოფელში 1005 ადამიანი ცხოვრობდა. სოფელი ლეკებით არის დასახლებული.
