„ეს არის თქვენი მანდატი, ამისთვის შეიქმენით და ნუ ანაწილებთ პასუხისმგებლობას სხვაზე. გააკეთეთ დასკვნები და მერე გავაგრძელოთ ამაზე კამათი,“ - ასე პასუხობს შს მინისტრი, გიორგი გახარია, „ხორავას ქუჩის" საქმეზე შექმნილი საგამოძიებო კომისიის წევრების კითხვას, მირზა სუბელიანის წინააღმდეგ საქმის კვალიფიკაცია უნდა შეიცვალოს თუ არა.
კომისიის წევრი „ევროპული საქართველოდან“, ოთარ კახიძე, დაინტერესდა, თვლიდნენ თუ არა გიორგი გახარია და ირაკლი შოთაძე, რომ დასაწყებია გამოძიება, რომელმაც უნდა შეისწავლოს მირზა სუბელიანი ხომ არ იყენებდა სამსახურეობრივ მდგომარეობას ან პირად ნაცნობობას იმისთვის, რომ ხელი შეეშალა გამოძიებისთვის.
„ძალიან თეორიული შეკითხვაა და თეორიულ პასუხს გაგცემთ. იმისთვის, რომ თქვენს თეორიულ შეკითხვაზე რაიმე პასუხი მივიღოთ, პირველ რიგში უნდა დავადგინოთ მიზეზ-შედეგობრივი კავშირი საბოლოო შედეგთან. რეალურად, მირზა სუბელიანი, მისი შვილი და მისი ნათესავები არიან ერთეულები იმ მცირეოდენ ადამიანებს შორის, ვინც მაშინაც თანამშრომლობდა გამოძიებასთან და დღესაც თანამშრომლობს. რეალურად, დაველოდებით კომისიის დასრულებას, რომლის ძირითადი მიზანიც არის, რომ გამოვავლინოთ ის შესაძლო პროცედურული დარღვევები, ან უფლებამოსილების გადამეტება და ამის შემდეგ ვიმსჯელებთ თქვენთან ერთად ამ საქმეზე. ამ ეტაპზე ვთვლი, რომ მირზა სუბელიანთან დაკავშირებით გამოძიება დაწყებულია, ის არის დაკავებული და ეს სრულიად საკმარისია იმისთვის, რომ, თუ გამოვლინდა დამატებითი ფაქტორები, ბრალის კვალიფიკაცია შეიცვალოს. ველოდებით თქვენს დასკვნას, ამისთვის ხართ შექმნილი,“ - განაცხადა გახარიამ.
ამ წუთებში „ხორავას ქუჩის“ საქმეზე შექმნილი პარლამენტის საგამოძიებო კომისიაში შს მინისტრის, გიორგი გახარიას და ყოფილი მთავარი პროკურორის, ირაკლი შოთაძის, გამოკითხვა მიმდინარეობს.
