„ამას გამოძიების შედეგზე არანაირი გავლენა არ ჰქონია,“ - ასე უპასუხა შს მინისტრმა, გიორგი გახარიამ, „ხორავას ქუჩის“ საქმეზე შექმნილი პარლამენტის საგამოძიებო კომისიაზე დასმულ კითხვას, თუ როგორ აფასებს იმ ფაქტს, რომ შსს-მ ვერ შეძლო, დაედგინა, რომ ვიდეოჩანაწერში მირზა სუბელიანი ჩანს და მას „უცნობ მამაკაცად“ მოიხსენიებს.
გარდა ამისა, მას გიგა ბოკერიამ ჰკითხა, თვლის თუ არა სიცრუედ შსს-ს მაღალჩინოსნის, ირაკლი ფიფიას, მიერ კომისიის სხდომაზე ნათქვამს, რომ ის მირზა სუბელიანს არ იცნობდა მაშინ, როდესაც მასთან 12-ჯერ აქვს დარეკილი.
ამ კითხვაზე პასუხად კი გახარიამ განაცხადა, „ამოიღეთ მაშინ ყველა ჩანაწერი, სხვა მშობლებთან რამდენჯერ არის დარეკილი და მაშინ ყველას იცნობდა?“
ამ წუთებში „ხორავას ქუჩის“ საქმეზე შექმნილი პარლამენტის საგამოძიებო კომისიაში შს მინისტრის, გიორგი გახარიას და ყოფილი მთავარი პროკურორის, ირაკლი შოთაძის, გამოკითხვა მიმდინარეობს.
