დეკანოზის თქმით, ამ შეხვედრის შემდეგ, მეუფეებს, გრიგოლსა და ილარიონს, წესით და რიგით, კითხვის ნიშნები აღარ უნდა ჰქონდეთ, - განუცხადა „ჯი-ეიჩ-ენს“ მსჯავრდებული დეკანოზის, გიორგი მამალაძის ადვოკატმა, გიორგი ფანცულაიამ.
მან ე.წ. მატროსოვის ციხე ახლახანს დატოვა. ის დეკანოზს მეუფეების, გრიგოლისა და ილარიონის საპყრობილეში ვიზიტთან დაკავშირებით ესაუბრა.
„დეკანოზთან შეხვედრაზე მეუფე გრიგოლი და მეუფე ილარიონი იყვნენ. მოგეხსენებათ, დაახლოებით, 10 დღის წინ, დეკანოზმა მიმართვა გაავრცელა, რომ მასთან მეუფეები შესულიყვნენ. ალბათ, იცით, რომ მეუფეების გარკვეული ნაწილი ამ საქმიდან თითქოს, დისტანცირებას ცდილობს, იმ მიზეზით, რომ მათთვის კითხვის ნიშნები არსებობს.
დეკანოზთან წინა შესვლის შემდეგ, მეუფე გრიგოლმა თქვა, რომ მისგან გარკვეულ კითხვებზე პასუხი მიიღო, გარკვეული კითხვები კი ისევ ჰქონდა. გუშინდელი შეხვედრის შემდეგ კი, ეს კითხვები არ უნდა არსებობდეს იქიდან გამომდინარე, რომ მათ ყველაფერზე ამომწურავი პასუხები მიიღეს. დეკანოზი სხვა მეუფეებსაც ელოდება, რომ თუკი, ვინმეს რამე კითხვა აქვს, ერთხელ და სამუდამოდ, პასუხები მიიღონ“, - აცხადებს ფანცუალაია.
როგორც ის განმარტავს, დეკანოზსა და მეუფეებს შორის საუბარი, როგორც სამართლებრივ საკითხებს, ასევე საპატრიარქოში განვითარებულ მოვლენებს შეეხო. თუმცა, ადვოკატი დეტალების დაკონკრეტებისგან თავს იკავებს.
„ეს საუბარი თავიდან ბოლომდე, როგორც იურიდიულ, ასევე საპატრიარქოსთან მიმართებაში არსებულ საკითხებს ეხებოდა, რაც მთლიანობაში ქმნის სურათს, თუ რატომ არის დეკანოზი ციხეში, რა ძალებმა, რა დინებებმა მიიყვანეს ის იქ და რისი მსხვერპლია“, - აცხადებს ფანცულაია.
